Díli, 30 Outubru 2026 (Iklik.Info)— Ohin estadu Timor-Leste fó Medalla Ordem de Timor-Leste ba Embaixadora Austrália iha Timor-Leste, Caitlin Wilson, nu’udar rekoñesimentu ba nia servisu, kontribuisaun signifikativa no papél importante iha hametin relasaun diplomátika no kooperasaun entre Timor-Leste no Austrália durante nia mandatu diplomátiku iha nasaun ne’e.
Iha komunikadu ofisiál ne’ebé Iklik News sita katak, ohin Prezidente Repúblika José Ramos-Horta kondekora Embaixadora Austrália nian ba Timor-Leste, Caitlin Wilson, ho Medalla Ordem de Timor-Leste, nu’udar rekoñesimentu ba nia servisu no kontribuisaun signifikativa iha hametin relasaun diplomátika no kooperasaun entre Timor-Leste no Austrália.
Ordem de Timor-Leste mak onra nasionál aas liu iha Repúblika Demokrátika Timor-Leste, ne’ebé fó ba individu sira ne’ebé hala’o servisu esepsionál no hatudu méritu boot ba nasaun. Embaixadora Caitlin Wilson hetan distinsaun ida ne’e liuhusi Dekretu Prezidente Repúblika Nú. 127/2026.
Ida ne’e nu’udar rekoñesimentu ba nia knaar relevante iha servisu ba povu Timoroan no kontribuisaun signifikativa ba setór oioin iha prosesu dezenvolvimentu nasionál, liuliu iha ámbitu relasaun diplomátika entre Austrália no Timor-Leste durante nia misaun iha nasaun ne’e.
Embaixadora Wilson hahú nia knaar nu’udar Embaixadora Austrália nian iha Timor-Leste iha Dezembru 2023, depoisde hahú servisu nu’udar Enkarregada Negósiu Austrália nian iha Timor-Leste iha Maiu 2023. Antes nomeasaun ida ne’e, nia okupa pozisaun nu’udar Sekretária Asistente Dahuluk ba Divizaun Efikásia no Abilitasaun Dezenvolvimentu iha Departamentu Negósiu Estranjeiru no Komérsiu Austrália nian (DFAT).
Antes ne’e, Embaixadora Wilson mós hala’o knaar nu’udar Adjunta Xefe Misaun iha Papua-Nova Guiné no Adjunta Reprezentante Permanente iha Misaun Austrália nian ba Nasoins Unidas iha Nova Iorke. Aleinde pozisaun rua nu’udar Adjunta Xefe Misaun, nia mós iha esperiénsia diplomátika iha Paris, Illa Salomão no Papua-Nova Guiné.
Durante nia mandatu nu’udar Embaixadora iha Timor-Leste, Embaixadora Wilson superviziona prosesu hametin relasaun entre Timor-Leste no Austrália to’o nivel aas iha istória relasaun bilaterál nasaun rua ne’e.
Realizasaun importante sira durante nia mandatu inklui avansu ba Parseria Foun ba Era Foun, ne’ebé asina husi Primeiru Ministru Timor-Leste, Kay Rala Xanana Gusmão, no Primeiru Ministru Austrália, Anthony Albanese, durante vizita ofisiál Primeiru Ministru Austrália nian ba Díli iha Janeiru 2026.
Aleinde ne’e, nia mós kontribui ba apoiu Austrália nian ba adezaun Timor-Leste ba ASEAN iha 2025, mobilizasaun asisténsia Austrália nian ba vizita istórika Papa Francisco ba Timor-Leste iha 2024, hametin kooperasaun iha área seguransa no dezenvolvimentu kapasidade, no habelar kooperasaun ekonómika no negósiu ne’ebé sei lori benefísiu ba prosperidade komún Timor-Leste no Austrália nian iha futuru.
Kontribuisaun Embaixadora Wilson ba relasaun entre Timor-Leste no Austrália sei iha impaktu ba tempu naruk, nu’udar testemuña ba nia servisu maka’as, lideransa, parseria no amizade ne’ebé nia harii ho komunidade no instituisaun sira iha Timor-Leste tomak.
Prezidente Repúblika, José Ramos-Horta, iha ninia mensajen rekoñesimentu ba Embaixadora Wilson, hato’o nia apresiasaun ba kontribuisaun no servisu diplomátiku ne’ebé nia hala’o durante nia mandatu iha Timor-Leste.
“Lori povu Timor-Leste nia naran, ho haksolok ha’u kondekora Medalla Ordem de Timor-Leste ba Embaixadora Caitlin Wilson nu’udar rekoñesimentu ba ninia servisu distintu no kontribuisaun pesoál ba amizade ne’ebé dura entre Austrália no Timor-Leste,” dehan Prezidente Ramos-Horta bainhira konsidera Embaixadora Austrália Caitlin Wilson iha Palásiu Prezidensiál Bairu-Pite, Sexta 30/10.
Durante ninia mandatu tomak, Embaixadora Caitlin defende Timor-Leste nia parseria ekonómika, fó apoiu ba peskiza agríkola no dezenvolvimentu rurál, avansa oportunidade ba traballadór Timoroan sira, no ajuda eleva Timor nia relasaun ba parseria estratéjika ida ne’ebé komprensivu.
Embaixadora Austrália Caitlin Wilson ninia mandatu mós koinside ho vizita istórika husi Sua Santidade Papa Francisco iha fulan-Setembru 2024, bainhira Austrália nia apoiu valiozu no kooperasaun besik kontribui maka’as ba susesu no seguransa husi eventu istóriku ida ne’e.
“Hodi Timoroan hotu nia naran, ha’u hato’o ami nia apresiasaun maka’as ba Embaixadora Caitlin no Governu no povu Austrália nian ba sira nia amizade no apoiu ne’ebé dura. Ha’u dezeja susesu, saúde di’ak no ksolok iha ninia kapitulu tuirmai. Nia sempre simu iha Timor-Leste, nasaun ida-ne’ebé hanoin hikas amizade no hafolin parseria jenuína sira,” afirma Prezidente Ramos-Horta.
Depois de simu Medalla Ordem de Timor-Leste husi Prezidente Repúblika, Embaixadora Caitlin Wilson mós hato’o ninia sentimentu kona-ba despedida husi Timor-Leste, ne’ebé nia servisu durante tinan hirak ne’e.
“Atu dehan liafuan ‘adeus’ ne’e nunka fasil. Ha’u sei husik hela Timor-Leste ho sentimentu haksolok, maibé sei hanoin nafatin povu Timoroan sira no iha optimizmu ba futuru. Timor-Leste sei iha nafatin iha ha’u nia fuan,” hateten Embaixadora Caitlin Wilson.
Atribuisaun Medalla Ordem de Timor-Leste ba Embaixadora Caitlin Wilson reflete respeitu no gratidaun husi povu Timor-Leste ba nia servisu, amizade no kontribuisaun sira ne’ebé nia fó ba nasaun, liuliu iha hametin relasaun diplomátika no kooperasaun entre nasaun rua.
Prezidente Ramos-Horta reafirma Timor-Leste nia gratidaun profunda ba amizade no asisténsia Austrália nian, ne’ebé durante ne’e sai nu’udar parseiru importante iha dezenvolvimentu no seguransa Timor-Leste nian dezde restaurasaun independénsia iha 2002.
Nasaun vizinhu rua ne’e sei kontinua hametin no habelar sira nia parseria produtiva iha área interese komún oioin, ho objetivu atu promove dezenvolvimentu, estabilidade no prosperidade ba nasaun rua iha tinan sira oin mai.
Jornalista: David da Costa
