DILI, 30 de Outubro de 2026(I-KLIK.INFO)-Relasiona ho polítika governu nian liuhusi Komisariu Reguladora Arte Marsial (KRAM) ne’ebé prepara ona planu atu reativa Grupu Arte Marsial iha Janeiro tinan oin, nune’e Conselho Nasionál Juventude Timor Leste (CNJTL) husu atu governu presiza halo preparasaun masimu hodi reativa tanba loron 90 ba sosializasaun no reatualizasaun la masimu nune’e presiza tinan ida rua, nune’e CNJTL Prefere atu reativa depois eleisaun parlamentar iha tinan 2028 la’ós antes eleisaun.
Prezidente Konsellu Juventude Dili Marcos Lobo dehan, CNJTL nia pozisaun la konkorda wainhira reativa iha anu lektivu 2027 no propoem atu reativa depois eleisaun 2028, atu nune’e labele loke marjin no fo espasu atu uza iha momentu ne’e hodi grupu sira ne’e atu ataka malu destroi malu liuliu vinkulu públiku sira populasaun nia uma espasu públiku sira sempre hetan estragu.
“Rekomendasaun ne’e profunda tebes tanba saida maka ita husu 2028 mak tenke reativa, tuir parte KRAM nian ba sosializasaun presiza loron 90 tuir ita nia pontu de vista tenke kria formasaun ne’ebé regirozu no kualidade ba líder arte marsiais sira perante tinan rua atu sira prepara sira nia mentalidade hodi treinu nia membru sira ho responsabilidade” dehan Prezidente Konsellu Juventude Dili Marcos Lobo liuhusi konferénsia imprensa iha iha CNJTL Farol, (30/10).
CNJTL mos rekomenda atu muda konseitu formasaun sira ne’ebé antes ne’e iha pursentu 80 ba treinu fiziku no pursentu 20 ba treinu psikolojia maibé muda hikas ba treinu psikolojia maka 80 pursentu no treinu fiziku pursentu 20 atu membru sira husi grupu arte marsiais sira iha mentalidade no responsabilidade ba nasionalizmu no patriotizmu.
“Ita la dun governu maibé ita hanesan sidadaun timor iha hanoin tilun matan diak katak intensaun di’ak maibé keta subar buat balun iha intensaun sira ne’e” dehan Marcos Lobo.
Nia konklui, realidade ne’ebé hatudu ona ho faktu katak kuandu tempu besik ona eleisaun mosu reativasaun ba pratika arte marsiais maibé depois remata tiha eleisaun kontinua taka fila fali pratika sira ne’e, nune’e CNTL husu mós ba lideransa partidu polítika sira iha Timor Leste atu para ona no labele uza arte marsiais no rituais ho juventude sira hodi atinji de’it sira nia objetivu iha eleisaun, no tenke konsidera juventude feto ho mane nuudar jerasaun kontinuador no esperansa futuru rai ida nee nian.
Jornalista: Silvino Freitas
