DILI, 04 de Novembru 2026 (I-KLIK.INFO)-Durante selebrasaun loron finadu iha loron 1 no 2 fulan novembru nian Polísia Nasionál Timor Leste (PNTL) la rejista kazu konflitu ruma ne’ebé akontese iha semiteriu sira iha Kapitál Dili nian, maskí iha insidente balun ne’ebé akontese maibé laiha relasaun ho selebrasaun loron finadu nian.
Komadante PNTL Munisípiu Dili Komisariu Assitente Orlando Gomes klarifika, durante selebrasaun loron matebian ne’ebé realiza iha loron 1 no 2 fulan novembru ne’ebé komunidade sira hahú atividade sira komesa husi hamoos semiteriu no vizita semiteriu hodi sunu lilin, nune’e situasaun sira lao hakmatek no kontroladu tebes tanba komandu munisípiu Dili husi planu ne’ebé koloka membru sira iha semiteriu sira.
“Komandu Munisípiu Dili monta mos postu iha fatin risku sira, ita mos halo patrullamentu makaas iha tempu kalan loron wainhira ita nia komunidade sira ba vizita no hamoos rate ita tau kedas seguransa kuaze kapital Dili ita koloka hotu membru sira iha semiteriu sira hotu” dehan Komadante PNTL Munisípiu Dili Komisariu Assitente Orlando iha Eskuadra Dom Aleixo Aimutin, (04/11).
Komisariu Assitente Orlando Gomes informa, durante asegura situasaun iha loron boot finadu Komandu Munisípiu Dili hetan mos apoiu efetivu husi komandu jerál PNTL, apoiu mos husi sentru formasaun polísia, unidade espesial polísia, unidade polísia maritima, UPF no apoiu mos F-FDTL hodi halo operasaun konjuntu ne’ebé ho intensaun atu sidade Dili hetan seguransa ne’ebé adekuadu iha semiteriu sira, tanba intensaun polísia nian hakarak prevene konflitu iha semiteriu sira, garante ordem no seguransa publika durante atividade rejioju no kontrola movimentu komunidade sira iha fatin risku.
“Ita mos hetan koordenasaun di’ak Konsellu Kolisiamentu Komunitaria (KPK) ne’ebé apoia makaas mos husi suku sira, antes ne’e ita mos halo parada no enkontru ho OPS no KPK sira ne’ebé koloka sira iha tempu kalan hodi halo patrullamentu ho OPS no sira mos halo seguransa iha semiteriu sira apoiu mos joven no komunidade sira tanba polísia halo aprosimasaun no komunikasaun di’ak ho sira sira apoiu ita nune’e iha finadu dia 1 no 2 ita nia situasaun seguransa lao hakmatek no laiha perturbasaun ordem públika ruma no laiha akontesimentu ruma iha semiteriu iha Kapitál Dili tomak” dehan Komisariu Assitente Orlando Gomes.
Enkuantu kazu partikular seluk ne’ebé laiha relasaun ho selebrasaun loron matebian maibé akontese iha loron finadu nian maka PNTL rejista mos kazu liu sanulu maka arma branka violénsia domestika violasaun seksual ofensa simples no kazu koasaun seksual iha Dom Aleixo kazu ameasa iha Bekora, iha loron 2 nian maka iha mos kazu simples hanesan suisida tara an iha bekusi, nune’e husi kazu sira ne’e polísia konsege detein suspeitu nain 4 ba kazu violénsia domestica no furtu agravadu nune’e sira ne’e no polísia prepara ona auto notísia sira atu prezenta ba ministeriu públiku.
“Durante finadu iha tinan ida ne’e detein de’it suspeitu 4 kompara ho tinan sira kotuk ne’ebé ita detein dalaruma liu sanulu tanba tinan ida ne’e ita halo servisu makaas” konklui Komisariu Assitente Orlando Gomes.
Jornalista: Silvino Freitas
