Díli, 15 Setembru 2026 (Iklik.Info) – Sekretariu Estadu Formasaun Profisionál no Empregu (SEFOPE) lansa rezultadu Estudu Buka Tuir Graduadu (Tracer Studies 2025) no Imajén Jerál Merkadu Traballu 2025, edisaun 15, ne’ebé sei sai nu’udar referénsia importante hodi komprende situasaun graduadu sira no dezenvolvimentu merkadu traballu iha Timor-Leste.
Iha komunikadu ofisiál ne’ebé Iklik.Info sita katak, Iha serimónia lansamentu, Sekretáriu Estadu SEFOPE, Rogério Araújo Mendonça, hateten, peskiza ne’e importante tebes tanba ninia objetivu mak buka tuir situasaun graduadu sira no aprezenta imajén jerál kona-ba merkadu traballu bazeia ba dadus no rezultadu peskiza tinan 2025.
“Publikasaun Relatóriu Peskiza Imajén Jerál Merkadu Traballu 2025 no Estudu Graduadu Tinan 2025 iha Timor-Leste marka pasu importante ida iha esforsu nasionál atu komprende no hadi’a situasaun merkadu traballu iha ita nia país,” dehan SEFOPE Rogério Araújo iha serimónia lansamentu iha CNFP Becora, Segunda 14/09.
Sekretáriu Estadu akresenta, ema hotu-hotu iha responsabilidade atu kontribui hodi fó oportunidade ba sidadaun sira atu asesu ba servisu. Nia hateten katak rezultadu peskiza ne’e bele sai nu’udar referénsia importante ba dezenvolvimentu forsa traballu iha Timor-Leste.
“Ha’u konvida ita hotu atu uza rezultadu peskiza ida-ne’e ho responsabilidade no seriedade, hodi kontribui ba formulasaun polítika públika ne’ebé efetiva, inkluziva no orientada ba kriasaun oportunidade empregu ba sidadaun hotu,” dehan Rogério Araújo.
Nia mós hateten, ho espírito kooperasaun, inovasaun no kompromisu, Timor-Leste bele dezenvolve forsa traballu ne’ebé kualifikadu no kompetente, ne’ebé kapaz atu responde ba dezafiu nasionál no internasionál, inklui oportunidade sira iha merkadu traballu.
“Ho espírito kooperasaun, inovasaun no kompromisu, ha’u fiar katak Timor-Leste bele dezenvolve forsa traballu ne’ebé kualifikadu no kompetente, kapaz atu responde ba dezafiu nasionál no internasionál, no aproveita oportunidade iha merkadu traballu,” dehan Rogério Araújo.
Sekretáriu Estadu ne’e mós hato’o apresiasaun ba Direksaun Sentru Informasaun Merkadu Traballu (CIMT), ne’ebé servisu maka’as hodi prepara no publika rezultadu peskiza ne’e.
“Ha’u mós hato’o parabéns ba ita boot sira hotu tanba susesu públika rezultadu estudu ne’e. Ha’u hein katak relatóriu ida ne’e sei sai referénsia importante ba dezenvolvimentu polítika no programa merkadu traballu iha futuru,” tenik Rogério Araújo.
Sekretáriu Estadu mós hato’o apresiasaun ba DG-SENE, Diretór CIMT, ekipa téknika, peskizadór sira, instituisaun públika no parseiru sira hotu ne’ebé fó kontribuisaun durante prosesu halibur, analiza no prepara dadus no informasaun kona-ba situasaun merkadu traballu no Estudu Buka Tuir Graduadu iha Timor-Leste.
Importánsia Peskiza Merkadu Traballu 2025
Peskiza kona-ba Imajén Jerál Merkadu Traballu 2025 importante tebes tanba publikasaun relatóriu ida ne’e la’os de’it dokumentu estatístiku, maibé mós sai nu’udar instrumentu importante hodi komprende ho kle’an liután realidade merkadu traballu iha Timor-Leste.
Merkadu traballu mak área estratéjika ida ne’ebé diretamente liga ho dezenvolvimentu ekonomia, bem-estar sosial no futuru juventude sira iha Timor-Leste.
Iha kontestu ida ne’e, Governu kontinua komprometidu atu dezenvolve rekursu umanu Timor-Leste ne’ebé kompetente, produtivu no kapaz atu responde ba nesesidade dezenvolvimentu nasionál.
Tanba ne’e, preparasaun juventude ho kualifikasaun no kompeténsia profisionál sai prioridade importante, atu nune’e bele aumenta oportunidade empregu no garante katak forsa traballu iha Timor-Leste iha kapasidade atu responde ba nesesidade merkadu traballu iha futuru.
Jornalista: David da Costa
