Dili, 15 de Setembro de 2026 (I-Klik.info): Liuhusi sesaun solene IV sesaun legislativa iha VI lejilatura Xefe Bankada Partido Libertasaun Popular (PLP) Deputada Maria Angelina Sarmento kestiona funsionamentu Prezidente Parlamentu Nasionál ne’ebé jere plenaria parlamentu ho produtividade liuhusi ajenda debate plenaria, kestiona mos Prezidente da Republika José Ramos Horta ne’ebé durante mandatu halao viajen hamutuk 55 ba nasaun 36 maibe la kontribui ba mudansa moris povu nian maibé hamiis gastu osan rezerva estadu nian.
Xefe Bankada PLP, Maria Angelina Sarmento dehan, durante iha sesta lejislatura ne’ebé lidera husi feto ida ne’ebé la hatudu produtividade nuudar orgaun lejislador bankada governu la halo konsertasaun iha nonu governu atu defini lei prioridade sira ne’ebé parlamentu nasionál presiza debate no aprova, lei barak mak pendente no dalaruma laiha ajenda plenaria iha tempu resesu mos komisaun permanente la ezerse nia funsaun ho di’ak, laiha kovokatoriu ruma durante fulan rua nia laran.
“viajen prezidente republika nian ne’ebé desloka ba Indonesia ho Singapore parlamentu nasionál la konsege asentimentu ba viajen xefe estadu nian tuir konstituisaun haruka” informa Prezidente bankada PLP Maria Angelina Sarmento iha sesaun solene kuarta sesaun lejislativa iha parlamentu nasionál, (15/9).
Xefe Bankada Opozisaun nee mos kestiona Xefe Estadu José Ramos Horta ne’ebé asume mandatu ba dalarua ne’ebé sempre hato’o mensajen ba estadu ho forma elokuente maka reforma seitor justisa, indepedénsia judicial no kosolidasaun demokratika, xefe estadu fo enfaze no ejorta kriasaun supremu tribunál defende indultu umanitariu no alerta infilitrasaun rede kriminoza estranjeira iha Timor Leste.
“Maibe fulan hira ikus fatin barak inklui Dili no Likisá autoridade seguransa desmantela residensia burla, online scam no krime organizadu tranznasional oioin, ema atus ba atus maka hetan detensaun maibé rejultadu maka ema halai sai husi Timor Leste ho livre ida ne’e reflete ita nia justisa sei fraku tebes iha artikulasaun hodi materializa lejislasaun vijente” dehan deputadu Maria AngelinaSarmento.
Deputada ne’e dehan tan, kestaun importante maka durante ne’e parlamentu nasionál inklui sosiedade Timor krítika ba viajen Xefe Estadu nian durante tinan tolu, gasta osan ba viajen estranjeiru maibe laiha efeitu direta ba povu hodi kontribui hamiis liu tan osan rezerva povu nian laiha efisensia la tuir prinsípiu poupansa ba dinheiru públiku no laiha rezultadu ba Timor Leste, maibe prezidente republika justifika katak viajen sira ne’e importante iha ita nia diplomasia hanesan membru ASEAN maibe dillomasia no etika diplomasia laiha resiprosidade no ekilibridade.
“Total hamutuk 36 paizes no 55 viajen, paiz balun hetan vizita dala tolu too dala lima, too ohin loron la kontribui ba mudansa signifikativu ba povu nia moris” konklui deputada Maria Angelina Sarmento.
Jornalista: Silvino Freitas
