Dili, 22 Outubru 2026 (iklik News) – Operasaun Krimi transnasional ne’ebe agora lao makaas iha rejiaun, hamosu preokupasaun ba publiku, iha besik tinan rua nia laran, ekipa operasaun Polisia Timor-Leste, kontinua detein grupu sira nebe halo serbisu iha scam call center iha Dili.
Ho Preokupasaun ne’e, iha vizita Vice Primeiru Ministru Australia, Richard Marles mai Timor-Leste hatan ba ABC News katak, krime transnasionál nu’udar dezafiu importante ida ne’ebé la’ós de’it afeta Timor-Leste, maibé mós nasaun sira iha Ázia Sudeste no Pasífiku.
Marles dehan atu kombate krime transnasionál, nasaun sira presiza hametin kapabilidade forsa polísia no forsa defeza, inklui ekipamentu, ró, pesoál treinadu, fahe informasaun intelijénsia no koordenasaun entre instituisaun sira.
“Ami hare krime transnasionál nu’udar dezafiu ida ne’ebé importante tebes ne’ebé hasoru Timor-Leste, maibé la’ós de’it Timor-Leste, rejiaun iha Ázia Sudeste, maibé mós liu husi Pasífiku,” Marles dehan.
Richard esplika katak kombate krime transnasionál presiza kapasidade operasionál ne’ebé adekuadu no kooperasaun metin entre instituisaun seguransa sira, atu bele responde ba ameasa ne’ebé kontinua aumenta iha rejiaun.
“Ne’e presiza kapabilidade duni, ró no pesoál sira ne’ebé iha kapabilidade atu ba no halo servisu ne’ebé sira presiza halo. Ne’e presiza fahe intelijénsia no koordenasaun no relasaun,” nia afirma.
Marles hateten Austrália iha komitmentu hakarak asegura relasaun no koordenasaun entre forsa polísia no forsa defeza husi nasaun rua iha nivel ne’ebé di’ak liu, atu bele kombate krime transnasionál ho efetivu.
Nia dehan Austrália no Timor-Leste komprende katak krime transnasionál sai dezafiu komún ida ne’ebé presiza responde hamutuk, ho kompromisu no kooperasaun kontinua.
Jornalista: David da Costa
