Dili, 22 Outubro 2026 (iklik News) – Governu Australia iha komitmentu hodi kontinua apoai Timor-Leste liuhusi setor defeza nian. Liuhusi vista ofisial Vice Primeiru Ministru Richard Marles, hodi hasoru malu ho Polisia Nasional Timor-Leste (PNTL), nia hateten fundus $62 miliaun ne’e parte husi apoia operasional, manutensaun inklui fornese ro tolu ba PNTL.
Marles haktuir ró sira ne’e sei aumenta kapabilidade patrullamentu marítimu polísia Nasionál Timor-Leste nian, atu bele hala’o atividade seguransa no kontrolu iha tasi ho efisiénsia liután.
“Nu’udar parte husi millaun $62 ne’e, ami fó ró tolu ba Polísia Nasionál Timor-Leste ne’ebé sei fó sira kapabilidade patrullamentu lalais iha tasi laran,” nia dehan.
Marles esplika katak ró sira ne’e sei fó kapabilidade adisionál ba PNTL atu hala’o atividade marítima, no Governu Austrália sei kontinua servisu hamutuk ho PNTL atu asegura katak treinamentu nesesáriu ba operasaun no manutensaun ró sira ne’e iha duni.
“Ami sei kontinua servisu liuhusi ita nia parseria ho Polísia Nasionál Timor-Leste hodi garante katak treinamentu hotu iha duni fatin kona-ba ne’e,” nia afirma.
Jornalista: David da Costa
