DILI, 27 de Outubru 2026(I-KLIK.INFO)-Kazu konflitu ne’ebe akontese iha suku Kotamutu Postu Administrativu Luro Munisipiu Lautem iha loron 23/10 ne’ebe rezulta sidadaun Silo lakon vida no nain rua maka Francisco Vila Nova kanek kamaan no Eusibio kanek todan no parte autoridade seguransa detein mos suspeitu nain 4 ba kazu refere, nune’e Prezidenti Komisaun Reguladora Arte Marsial (KRAM) konsidera insidente ne’e laos ho baze arte marsial tanba insidente ne’ebe baze mai husi arte marsial maka grupu sira ne’ebe involve tenke uza atributu arte marsial nian.
Prezidente KRAM Octavio da Conceição dehan, kazu konflitu ne’ebe akontese iha Luro-Lautem la’os baze mai husi arte marsial maibe omesidu refere komete husi individu sira tanba problema entre kondoutor ho pasajeiru mak hamosu problema ba malu nunee akontese sona malu, tanba ema neebe sona la’os membru arte marsial maibe ida ne’ebe lakon vida nee mak membru arte marsial nunee laos konflitu ne’ebe ho baze arte marsial.
“uluk kedas hau heteten konflitu arte marsial mak sira ne’ebe hatais farda tuku malu oho malu halo problema ida maka ita konsidera konflitu arte marsial” dehan Prezidenti KRAM Octavio da Conceição liuhusi konferensia imprensa iha salaun dalan ba dame KRAM Lesidere, (26/10).
Nia dehan tan, maibe konflitu ne’ebe laos organizadu maibe lori ema idak idak nia problema nee responsabilidade ema ida idak nian no sei ba hatan tuir grau krime ne’ebe individu ida komete, nune’e problema ne’ebe akontese tenke iha investigasaun atu bele hatene problema nia involve husi arte marsial.
“Ohin loron timoroan barak mak involve iha pratikante marsial kuandu problema nee ema la temi individu nia problema ema temi maka nia husi organizasaun arte marsial” dehan Octavio da Conceição.
Nia dehan tan, husi lei numeiru 9/2026 ne’ebe vigor ona nune’e durante loron 90 iha faze konsolidasaun sira sei ko’alia ho lider organizasaun sira hotu hotu joven sira atu krime ne’ebe akontese sei responsabiliza tuir ema ida idak nia aktu ne’ebe komete no la lori organizasaun nunee karik iha akontesimentu mak baze duni mai husi arte marsial maka sei lori lei refere hodi regula tuir prosedimentu legal husi lei foun no iha mos dekretu lei kontra ordenasaun ne’ebe aplikavel konflitu ne’ebe ho baze arte marsial.
Jornalista: Silvino Freitas
