DILI, 27 de Outubru 2026 (I-KLIK.INFO)-Plataforma Nasionál Bee Saneamentu no Ijene (PN-BESI) Timor-Leste realiza forum hodi halo diskusaun ba implementasaun programa bee no saneamentu neebe ijene ba povu tanba seitor bee no saneamentu importante tebes iha dezenvolvimentu nasaun nian.
Koordenador PN-BESI Januario Amaral dehan, forum ne’ebe inkui entidade relevante ba seitor bee no saneamentu nian mai husi governu, ajensia internasional sosiedade sivil ne’ebe halo servisu ba seitor bee no ijene nunee bele halo reforsu ida ne’ebe forte no mutua hodi halo intervensaun ba seitor refere.
“PN-BESI hanesan parseiru estratejiku governu nia atu bele apoiu governu hodi bele implementa politika no programa sira atu bele atinji planu boot ne’ebe governu iha ona liu liu tuir PEDN too 2030 asesu bee no saneamentu ba komunidade tenke too 100 pursentu” dehan Koordenador PN-BESI Januario Amaral iha salaun João Paulo Comoro, (27/10).
Januario dehan tan, hanesan parseiru governu nian nafatin halo advokasia maibe ho servisu kiik sira iha suku no aldeia kontinua reforsu planu governu nian liuliu iha nonu governu ne’ebe sita katak investimentu seitor bee no saneamentu nee sai prioridade ne’ebe reflete ba ema nia moris tanba bee sai rekursu importante ba ema nia nesesidade.
“Laiha bee la ko’alia kona-ba saúde bee la sufisiente ita la ko’alia kona-ba agrikultura no laiha agrikultura ita la ko’alia kona-ba seguransa alimentar tanba buat sira nee hanesan aspeitu integradu” dehan Januario.
Nia dehan tan, servisu integradu ne’ebe halo husi entidade sira governu ajensia internasional sosiedade sivil sira ho objetivu maka atu iha bee no saneamentu ne’ebe ijene ba povu, nune’e servisu neebe entidade sira nee foku maka atu bele atinji terjetu bee no saneamentu ne’ebe ijene ba povu.
Sekretariu Estadu Eletrisidade Bee no Saneamentu (SEEAS) Santos Noronha dehan, seitor bee no saneamentu importante tebes iha dezenvolvimentu nasaun nian, nune’e governu de’it sei labele tau matan hodi rezolve problema bee no saneamentu nune’e tenke involve parte hotu maka NGO nasional no internasional, empreza publika sira hanesan BTL ho mos lider komunitaria sira atu hola papel tau matan ba seitor bee no saneamentu.
“Husi WASH FORUM ida ne’e ita bele hetan presepsaun ne’ebe hanesan hodi bele dezenvolve diak liu tan seitor bee no saneamentu nee” dehan SEEAS Santos Noronha iha salaun João Paulo Comoro, (27/10).
Nia dehan tan, implementasaun ba programa bee no saneamentu laos hola parte de’it husi governu hanesan BTL maibe iha programa ho projeitu sira hanesan SMASA PDIM PNDS ne’ebe implementa mos projeitu bee no saneamentu sira, nune’e implementa moos husi ajensia internasional no sosiedade sivil balun, nunee husi WASH FORUM refere atu bele hetan presepsaun ho objetivu ne’ebe hanesan iha politika bee no saneamentu nian.
Jornalista: Silvino Freitas
