Dili, 14 de Setembro 2026 (I-Klik.info): Komandu Jerál Polísia Nasionál Timor Leste (PNTL) sei tau prioridade dahuluk ba konstrusaun edifisiu no infrastructura polísia nian iha komandu munisípiu Dili, tanba ne’e Komandu Jerál solisita ona ba autoridade relevante sira hanesan Minisiteriu Obras Públika (MOP) atu halo konstrusaun foun ba edifisiu komandu munisípiu Dili.
Komadante Jerál PNTL Komisariu Assitente Polísia Afonso dos Santos dehan, tempu badak nia sei halo observasaun iha komandu munisípiu Dili atu bele iha kapasidade infrastructura ne’ebé diak liu munisípiu sira hotu, tanba komandu munisípiu Dili sei halo servisu barak liu iha area seguransa nian iha kapital nasaun nian.
“Hau ko’alia tiha ona MOP tempu badak sira sei haree” dehan Komisariu Assitente Polísia Afonso dos Santos iha Komandu Polísia Munisípiu Dili, (14/9).
Nia informa tan, konstrusaun ba edifisiu sira komandu nian hahu ona husi ponta leste hanesan iha munisípiu Lautem sei kompleta iha tinan ne’e, enkuantu iha tinan oin sei haree tan ba iha komandu munisípiu Baucau ho Vikeke, enkuntu komandu munisípiu Dili sei la hein munisípiu sira seluk maibe tenke tau prioridade dahuluk iha konstrusaun infrastructura polísia nian tanba sai kapital nasaun nian.
Entretantu Segunda Komadante Munisípiu Dili Suprentidente Polísia Luis da Silva informa tan katak, prosesu konstrusaun ba komandu munisípiu Dili maka proposta sai husi ministeriu interior no sai ona ha iha Obras Públika maibe tanba iha item balun ne’ebé seida’uk kompletu nune’e entrega hikas ona ba tekniku sira iha ministeriu interior atu halo kompletu nunee mak sei haruka hikas mai iha PNTL hodi halo tenderizasaun iha tempu badak.
“Orsamentu ba konstrusaun ida nee foufoun ne’e iha liu rihun atus tolu maibe tanba tekniku sira mai haree rai iha tendensia ho fondasi badak labele kobre nunee sei aumenta osan liu rihun atus lima hodi harii konstrusaun ba tres estrelas komandu munisípiu Dili hodi bele halo servisu” informa Segundu Komadante Munisípiu Dili Suprentidente Polísia Luis da Silva iha komandu munisípiu Dili, (14/9).
Jornalista: Silvino Freitas
