Díli, 9 Novemberu 2026 (Iklik.Info) — Deputada Bankada FRETILIN, Cristina Yuri R. S. Costa, hateten katak projetu Greater Sunrise iha importánsia estratéjika ba futuru ekonómiku Timor-Leste. Tanba ne’e dezenvolvimentu projetu ne’e bele sai parte importante ida husi esforsu atu harii ekonomia nasaun nian.
Iha 27 Outubru 2026, Timor GAP asina ona akordu atu sosa partisipasaun 33,44% ne’ebé Companhia Woodside Energy iha projetu Greater Sunrise, ho valor to’o US$200 millaun.
Cristina Yuri afirma katak oportunidade boot ne’e mós lori responsabilidade no risku boot. Maski nune’e, Cristina subliña katak nia kaer metin liafuan Ministru nian kona-ba nesesidade atu la tauk liu risku sira, maibé tenke konsidera katak osan ne’ebé uza mak osan povu nian.
“Oportunidade boot mós lori responsabilidade no risku boot. Maibé, ha’u kaer metin Ministru nia liafuan, labele ta’uk demais ho risku sira. Ha’u mós espera katak Ministru konsiente katak osan ne’e povu nian,” hateten Deputada Bankada FRETILIN Cristina Yuri Bainhira halo intervensaun iha diskusaun OJE 2027 nian faze Jeneralidade iha Parlamentu Nasionál, Segunda 9/10.
Deputada Cristina Yuri haktuir katak Greater Sunrise bele sai parte importante ida husi futuru ekonomia Timor-Leste, maibé projetu ne’e tenke dezenvolve ho transparénsia, kapasidade téknika, finansiamentu sustentável no mekanizmu partilha risku ne’ebé klaru.
Primeiru Ministru (PM) Kay Rala Xanana Gusmão hateten katak, rekursu petrolíferu no minerál kontinua integra iha estratéjia dezenvolvimentu nasionál. Tanba ne’e OJE 2027 destina US$ 244,8 millaun ba polítika foun kona-ba setór petrolíferu no minerál, inklui apoiu ba TIMOR GAP ba projetu Kuda Tasi no Jahal, no avansu dezenvolvimentu Greater Sunrise.
“Hanesan ha’u refere ona, ita-nia rekursus petrolíferus no minerais kontinua integra ita-nia estratéjia dezenvolvimentu. Orsamentu 2027 afeta 244,8 millaun ba polítikas foun kona-ba setor petrolíferu no mineral, inklui apoiu ba TIMOR GAP ba projetus Kuda Tasi no Jahal no ba avansu Greater Sunrise. Murak-Rai Timor simu 14,9 milloens dólares atu apoia explorasaun mineral,” dehan Xanana Gusmão.
TIMOR GAP iha ona planu atividade atu hahú dezenvolve husi fulan Novembru 2026. Tanba kompleksidade operasaun sira, iha 2030 Timor-Leste espera bele haree dezenvolvimentu infraestrutura offshore no onshore iha Natarbora.
Entretantu, projetu Jahal no Kuda Tasi espera bele hahú fó reseita inisiál ba Fundu Petrolíferu antes 2030. Kompromisu hirak-ne’e sei konkretiza ho baze iha servisu tékniku rigorozu, avaliasaun komersiál sériu no prestasaun kontas ne’ebé transparente.
Jornalista: David da Costa
