Díli, 3 Setembru 2026 (Iklik.Info)– Governu Repúblika Korea Súl fó apoiu ekipamentu modernu, inklui komputadór no ekipamentu tékniku sira seluk, ba Polísia Sientífika Investigasaun Kriminál (PCIC) Timor-Leste, ho objetivu atu hametin kapasidade téknika no operasionál iha investigasaun kriminál.
Iha komunikadu ofisiál ne’ebé Iklik.Info sita katak, iha loron kuarta 2/09/2026, Ministru Justisa (MJ), Sérgio de Jesus Fernandes da Costa Hornai, simu ofisialmente apoiu ekipamentu hosi Embaixadór Repúblika Korea Súl iha Timor-Leste, inklui komputadór no ekipamentu tékniku sira seluk, ne’ebé destina ba Polísia Sientífika Investigasaun Kriminál (PCIC).
Apoiu ne’e iha objetivu atu hametin kapasidade institusionál no téknika Polísia Sientífika Investigasaun Kriminál (PCIC), no iha tempu hanesan reforsa kooperasaun bilaterál entre Timor-Leste no Repúblika Korea Súl, liuliu iha área justisa no investigasaun kriminál.
“Hato’o apresiasaun ba Governu no Povu Korea Súl tanba apoiu ne’ebé fó, no subliña katak doasaun ekipamentu ne’e importante tebes atu hadi’a kapasidade téknika no operasionál PCIC, liuliu iha prosesu rekolla, análize no prezervasaun evidénsia kriminál,” dehan Ministru justisa Sérgio Hornai iha pagina ofisiál Facebook Ministru Justisa nian, ne’ebe Iklik.Info asesu, Kinta 3/09.
Ministru Justisa Sérgio Hornai mós iha esperansa katak apoiu ne’e bele kontribui ba modernizasaun PCIC no haforsa kapasidade instituisaun ne’e iha prevensaun no kombate krime organizadu, krime transnasionál no krime kompleksu sira.
Tanba atu haforsa kapasidade PCIC importante atu suporta sistema justisa no garante implementasaun estadu direitu iha Timor-Leste, liuliu liuhosi investigasaun kriminál ne’ebé profisionál no bazeia ba evidénsia sientífika.
Iha oportunidade hanesan, Embaixadór Repúblika Korea Súl iha Timor-Leste hatudu kompromisu atu kontinua fó apoiu ba fortalesimentu kapasidade institusionál iha Timor-Leste. Apoiu ne’e sei hala’o liuhosi doasaun ekipamentu modernu, inklui komputadór no ekipamentu tékniku sira seluk ba PCIC.
Serimónia simu apoiu ne’e partisipa mós Diretor-Jerál Polítika Justisa, Diretor-Nasionál Polísia Sientífika Investigasaun Kriminál (PCIC), hamutuk ho funsionáriu sira hosi PCIC no Ministériu Justisa.
Apoiu hosi Repúblika Korea Súl ne’e konsidera hanesan parte ida hosi esforsu atu dezenvolve kapasidade institusionál no téknika iha área investigasaun kriminál, hodi ajuda Timor-Leste responde ho efetivu ba dezafiu krime iha nivel nasionál no transnasionál.
Jornalista: David da Costa
