Díli, 20 Outubru 2026, (Iklik.Info) — Governu Timor-Leste no Governu Austrália sei kontinua hametin kooperasaun bilateral iha área seguransa marítima, jestaun fronteira no kombate krime transnasionál, inklui peska ilegál sira, hodi proteje rekursu marítimu no asegura interese komún hosi nasaun rai rua nian.
Komandante Komandu Fronteira Marítima Austrália, Kontra Almirante Brett Stoner, hato’o nia apresiasaun ba Governu Timor-Leste, liuliu ba Primeiru Ministru Kay Rala Xanana Gusmão tanba fó oportunidade atu hasoru malu no ko’alia kona-ba kooperasaun entre nasaun rai rua nian.
“Ida ne’e onra no priviléjiu bo’ot ida atu fila fali mai Timor-Leste. Timor-Leste hanesan parseiru forte Austrália nian ne’ebé servisu hamutuk hodi kombate atividade ilegál no krime transnasionál. Ha’u hakarak hato’o agradese bá Primeiru Ministru ne’ebé fó oportunidade atu hasoru malu durante ha’u-nia vizita iha Timor-Leste,” dehan Brett Stoner, ba Jornalista sira iha Palásiu Governu, tersa 20/10.
Durante enkontru ne’e, parte rua diskute mós kona-bá rezultadu hosi parseria ne’ebé nasaun rua asina ona iha tinan 2025, no identifika área sira ne’ebé sei sai prioridade ba kooperasaun konjunta iha futuru atu kobre maka asuntu kona-ba imigrasaun no jestaun fronteira, inklui fronteira rai-maran, aeroportu no migrasaun.
“Entaun, ida ne’e foka liuliu ba seguransa marítima. Ami nia parseria ko’alia kona-ba imigrasaun no jestaun fronteira, nune’e ida.ne’e kobre mós fronteira rai-maran sira, aeroportu sira no migrasaun”, afirma Brett Stoner.
Maibé Brett Stoner esplika tan katak Timor-Leste ho Austrália iha interese komún atu hametin seguransa iha fronteira marítima, tanba atividade ilegál iha tasi bele hamosu impaktu ba ekonomia no jestaun rekursu marítimu.
Jornalista: David da Costa
