Díli, 17 Setembru 2026 (Iklik News) – Stock simentu CONCH iha merkadu Timor-Leste kontinua disponivel, ho 5.000 tonelada atualmente iha prosesu distribuisaun no 9.200 tonelada tan sei tama, maibé presu simentu sa’e ona iha merkadu, enkuantu iha área Aimutin, Díli, simentu Tonasa to’o ona US$5,50 kada saku.
Jerente Marketing Simentu CONCH, Kompaña Cement Timor Trending SA, Ligia Tilman, hateten stock simentu CONCH iha merkadu agora dadaun la’o normál, ho 5.000 tonelada ne’ebé kompañia sobu no fa’an hela atu atende nesesidade kliente sira.
Tilman hateten, aleinde 5.000 tonelada ne’ebé disponivel ona, Kompañia mós sei simu tan 9.200 tonelada husi ró ida ne’ebé iha kedas ró ida seluk nian kotuk. Nune’e, total stock ne’ebé tama sei aumenta atu garante atendimentu ba kliente sira iha merkadu. Maibé sementu Tonasa ne’e iha kompañia ne’e agora laiha.
“Dadaun ne’e simentu CONCH ami iha stock 5.000 tonelada mak ami sobu no fa’an hela hodi halo atendimentu ba kliente sira. Depois, 5.000 tonelada ne’e ami sobu hela, iha tan 9.200 tonelada ho ró ida mak iha kedas kotuk. Maibé ida Tonasa ne’e ami stock laiha,” dehan, Jerente Marketing Simentu CONCH, Kompaña Cement Timor Trending SA, Ligia Tilman ba Jornalista Iklik News, Iha Fatuhada, Kinta 17/09.
Tilman esplika, atendimentu ba kliente sira agora la’o normál fali, depois iha semana hirak liu ba kompañia hasoru atrazu, tanba makina ne’ebé uza atu halo no prepara simentu hetan avaria. Tanba kompañia hatama materiál foun ne’ebé foin sosa no presiza uza makina pesadu atu prosesu materiál ne’e. Bainhira makina avaria, atendimentu ba kliente sira hetan impaktu. Maibé, hahú husi Segunda-feira, makina ne’e di’ak ona no kompañia komesa atende fila-fali ba kliente sira hanesan bai-bain.
Kona-ba presu, Ligia hateten, antes folin mina sa’e, presu normál simentu CONCH US$3,85 kada saku ho kilogramas 40. Maibé, depois folin mina sa’e no fó impaktu ba kustu transporte no sasan iha merkadu, kompañia ajusta presu ba US$4,20 kada saku, tanba funu iha Médiu Oriente mos impaktu hotu ba folin sira ne’e.
Tilman hatutan tan, aumentu presu ne’e la’ós tanba stock simentu laiha, maibé tanba kustu transporte liuhusi ró mos sa’e. Tanba Cement Timor Trending mak distribuidór ofisiál, kompañia tenke ajusta presu atu bele kontinua halo operasaun no distribusaun simentu ba merkadu.
“Ami transporta simentu ho ró, entaun kustu ba ró mos sa’e. Ami hasae presu tanba situasaun mundial ne’ebé mundu hasoru, la’ós tanba stock laiha,” Tilman esplika.
Tilman mós hateten, kompañia fa’an simentu iha forma rua, mak kada saku no jumbo. Jumbo ida ho kapasidade 1 tonelada iha ekuivalente 25 saku, enkuantu jumbo ho 2 tonelada iha ekuivalente 50 saku. Presu jumbo nian kalkula tuir presu kada saku, ho baze US$4,20 kada saku.
Tilman esplika normalmente, kompañia hatama simentu entre 10.000 to’o 20.000 tonelada kada fulan, liuliu agora tanba iha projetu governu barak iha fatin oioin. No prioridade fornese simentu mak ba projetu governu, konsumidór sira ne’ebé uza simentu CONCH ba halo batako, no populasaun ne’ebé halo uma ki’ik.
Cement Timor Trending mos garante katak sei esforsu atu prevene falta stock simentu CONCH iha merkadu. Tanba kompañia iha ró tolu, ne’ebé ró ida mak propriedade rasik no ró rua seluk mak ró komersiál, atu garante transporte no entrada stock kontinua.
“Ami iha ró tolu, ró ida ami nia rasik no ró rua mak ró komersiál. Agora ami sobu hela ró ida ho 5.000 tonelada. Ami garante katak sei laiha falta stock iha merkadu, liuliu simentu CONCH,” nia dehan.
Aleinde ne’e, kompania iha armajen segundu iha Bebonuk atu atende kliente no projetu sira. Maibé, armajen boot tolu iha packing plant iha Kaitehu.
Tilman esplika, tanba informasaun espalla iha komunidade kona-ba stock simentu menus, kliente barak halai ba armajen iha Kaitehu atu hein no tula simentu. Tanba ne’e, kompania prefere halo distribuisaun diretamente husi Kaitehu ba kliente sira, envezde hatama hotu stock ba armajen Bebonuk no sentral hardware.
“Kliente sira tauk tanba rona informasaun katak stock simentu laiha, nune’e sira hein hotu iha ami nia armajen iha Kaitehu. Ami standby iha ne’ebá atu tula. Tanba ema barak hein ona iha ne’ebá, ami labele drop stock hotu mai Bebonuk no Sentral Hardware,” Tilman hateten.
Sementu Tonasa no CONCH Iha Aimutin Faan Ho Presu Diferente
Tuir informasaun ne’ebé Iklik News asesu diretamente iha tereinu, sementu ne’ebé faan iha área Aimutin, Díli, atualmente disponivel ho presu diferente tuir loja no marka semente.
Iha loja GUAN JIE Aimutin, sementu disponivel iha marka rua, mak CONCH no Tonasa. Sementu CONCH faan ho presu USD$5,00, enkuantu sementu Tonasa faan ho presu US$5,50.
Enkuantu iha loja Juqinyouan Lda, ne’ebé mós lokaliza iha Aimutin, faan sementu Tonasa ba konsumidór maibé stock maka laiha ona. Tuir informasaun asesu husi Iklik News, antes loja ne’e faan semente Tonasa ho presu US$4,50, maibé agora presu sa’e ona ba US$5,00.
Mudansa presu ne’e hatudu katak presu semente iha merkadu lokal bele diferensa entre loja ida ho loja seluk, no mos bele muda tuir situasaun merkadu no fornesimentu.
Reportajen: Ekipa Iklik News
