DILI, 28/October/2026 (I-Klik.info) – Autoridade Munisipál Dili (AMD) informa Semitériu Bekusi tama ona ba faze kritiku, tanba kapasidade hakoi mate besik remata. Preve kapasidade másima sei atinje iha Novembru 2026.
Iha konferensia imprensa, Presidente Autoridade Munisipál Díli, Francisco dos Santos hateten iha Kondisaun ida-ne’e preokupa tebes, tanba bele difikulta disponibilidade fatin ba hakoi mate foun sira iha Munisipiu Dili. Tanba ne’e, AMD kontinua servisu hamutuk ho entidade relevante sira, atu aselera preparasaun administrativu, tékniku no operasionál ba hahú funsionamentu Semitériu Metinaro.
“Autoridade Munisipál Dili (AMD) informa ba komunidade tomak katak, tuir avaliasaun teknika ne’ebé realiza ona husi servisu kompetente sira. Semitériu Bekusi agora daudaun tama ona ba faze kritiku tanba kapasidade disponivel ba hakoi mate sira besik remata. Preve katak kapasidade máxima semitériu ne’e sei atinje iha fulan Novembru 2026”.
Nia dehan, Funsionamentu Semitériu Metinaro importante tebes atu responde ba nesesidade atual no futuru komunidade nian, hodi aumenta kapasidade ba hakoi mate no evita problema sira ne’ebé bele mosu tanba limitasaun espasu iha semitériu sira.
AMD sei kontinua akompaña situasaun ida-ne’e ho atensaun máximu no sei fó informasaun ba públiku kona-ba dezenvolvimentu sira ne’ebé relasiona ho asuntu ida-ne’e.
“Hanesan medida temporária atu ajuda responde ba limitasaun kapasidade iha Semitériu Bekusi, AMD bele autoriza, tuir pedidu husi família no tuir regra ne’ebé vigora, loke fila-fali rate/kampa família nian ne’ebé eziste ona hodi haloot familiar ne’ebé foin mate. Medida ida-ne’e aplika ba semitériu Bekusi, Bidau Santa Ana no Cacaulidun, ho respeitu ba dignidade matebian sira no tuir norma sanitária no dispozisaun legal sira ne’ebé vigora”, dehan presidante ADM, ba jornalista sira iha salaun b edifisiu ADM Dili.
Nia informa, Iha oportunidade ida-ne’e, Autoridade Munisipál Dili (AMD) informa ba komunidade tomak katak família sira ne’ebé, ho forma voluntária, hakarak tau hamutuk restu mortál família nian iha rate ka kampa ida de’it iha Semitériu Santa Cruz, Santa Ana, Bekusi no Cacau Lidun, ka hakarak muda (traslada) restu mortál sira husi semitériu ida ba semitériu seluk iha Dili laran ka ba munisipiu seluk, tenke husu uluk autorizasaun ba AMD.
” Ita tenke kumpri dispozisaun legal sira ne’ebé vigora. Depois de hetan autorizasaun, bele realiza prosedimentu sira hanesan ezumasaun (hasai restu mortál husi rate/kampa), trasladasaun (transporta restu mortál ba fatin ka semitériu seluk) no re-inumasaun (hakoi fila-fali restu mortál) iha rate/kampa familia nian ne’ebé eziste ona. Responsabilidade ba preparasaun, lojistika, transporte no despeza operasionál sira relasiona ho prosedimentu hirak ne’e sei sai responsabilidade família nian”, nia informa
Nia esplika, Informasaun detalhada kona-ba prosedimentu, dokumentasaun nesesária no etapa administrativu ba prosesu hirak ne’e disponivel ona iha anúnsiu públiku ne’ebé prepara ona husi AMD no sei publika ba asesu média no komunidade interesada sira agradese ba atensaun, komprensaun no kolaborasaun husi komunidade tomak, no reafirma ninia kompromisu atu kontinua presta servisu públiku ho responsabilidade, respeitu no dignidade.
Jornalista, Joanina Casamiro
