Díli, 16 Setembru 2026 (Iklik.Info) – Governu ohin liuhosi reuniaun Konsellu Ministrus aprova projetu Dekretu-Lei foun kona-ba Rejime Selesaun no Kontratasaun Advogadu ba Reprezentasaun Forense Estadu, atu estabelese regra no prosedimentu klaru iha prosesu hili no kontrata advogadu ka sosiedade advogadu ba reprezenta interese legál Estadu iha tribunál judisiál, arbitrajen no instánsia internasionál sira.
Iha komunikadu ofisiál ne’ebé Iklik.Info sita katak, iha reuniaun Konsellu Ministrus aprova projetu Dekretu-Lei ne’ebé aprezenta hosi Ministru Prezidénsia Konsellu Ministrus, Agio Pereira, kona-ba Rejime Selesaun no Kontratasaun Advogadu ba Reprezentasaun Forense Estadu.
“Dekretu-Lei ida-ne’e estabelese prosedimentu atu hili no kontrata advogadu ka sosiedade advogadu ida, atu garante reprezentasaun legál no patrosíniu forense Estadu nian iha tribunál judisiál no arbitrajen nia oin,” Hateten iha komunikadu ne’ebe Iklik.Info asesu husi website ofisiál Governu nian timor-leste.gov.tl, kuarta 16/09.
Iha rejime ne’e liuliu aplika ba prosesu sira ne’ebé iha kompleksidade espesiál ka relevánsia ba Estadu, ne’ebé presiza reprezentasaun jurídika espesializada.
Prosesu hirak ne’e inklui, entre sira seluk, kazu ho kompleksidade faktuál ka téknika ne’ebé aas, asuntu espesializadu, prosesu sira ne’ebé akontese iha tribunál estranjeiru, tribunál arbitrajen ka instánsia internasionál sira, ne’ebé bele iha impaktu finanseiru signifikativu ba Orsamentu Jerál Estadu, ka involve informasaun klasifikada, konfidensiál ka sensivel.
Kualifikasaun ba prosesu ida hanesan ho kompleksidade espesiál ka relevánsia sei halo liuhosi despaxu fundamentadu hosi Primeiru-Ministru, tuir proposta hosi membru Governu ne’ebé tulun nia iha Prezidénsia Konsellu Ministrus, membru Governu ne’ebé responsável ba área refere, ka entidade ne’ebé iha interese ba prosesu ne’e.
Advogadu ne’ebé atu kontrata tenke iha pelumenus esperiénsia tinan lima iha área direitu espesífika ne’ebé relasiona ho prosesu ne’e, no iha domíniu pelumenus ida hosi lian ofisiál rua ne’e ida.
Iha kazu ka prosesu sira ne’ebé akontese iha rai-li’ur ka uza lian estranjeiru, advogadu ne’e tenke domina lian ne’ebé uza iha prosesu refere. Diploma ne’e mós estabelese regra sira ho objetivu atu prevene konflitu interese iha prosesu kontratasaun advogadu.
Nomeasaun ba mandatáriu judisiál sei hala’o liuhosi despaxu fundamentadu hosi Primeiru Ministru, ne’ebé bele delega kompeténsia ida ne’e ba membru Governu ne’ebé koadjuva nia iha Prezidénsia Konsellu Ministrus.
Iha kazu urjénsia, nomeasaun bele hala’o hosi membru Governu ida ne’e, ne’ebé tuirmai tenke informa Primeiru Ministru. Ho aprovasaun ba diploma ida ne’e, revoga tiha Dekretu-Lei N.° 16/2012, loron 4 fulan-abríl, kona-ba Reprezentasaun Estadu iha Tribunál.
Jornalista: David da Costa
