Díli, 26 Outubru 2026 (Iklik.Info) — Estadu Timor-Leste, liuhusi Prezidente Repúblika (PR) José Ramos-Horta, kondena ho maka’as atake tiruteiu masál kontra fiar-na’in sira iha Igreja Ortodoksa Grega São Jorge, iha Provínsia Karak, Jordania, iha 23 Outubru 2026, ne’ebé hamosu vítima sivíl inosente no viola direitu umanu, liberdade relijioza no valor umanidade.
Prezidente Repúblika José Ramos-Horta, ne’ebé mós laureadu Nobel ba Pás, kondena ho maka’as atake tiruteiu masál ne’ebé akontese iha Igreja Ortodoksa Grega São Jorge, iha Provínsia Karak, Jordania, iha Sesta-feira, 23 Outubru 2026. Atake ne’e dirije hasoru fiar-na’in sira ne’ebé halibur atu partisipa iha serimónia funeral relijioza.
Ramos-Horta hateten katak aktu violénsia ne’e la iha sentidu no sai krime grave hasoru ema sivíl inosente sira. Maibé aktu hanesan ne’e viola direitus umanus, liuliu direitu ema nian atu hala’o atividade relijioza no adora Maromak iha ambiente pás no liberdade.
“Atake ida ne’e reprezenta atake ida hasoru ita nia umanidade no valores komún, respeitu no koezaun sosiál no relijioza, liuliu iha rejiaun ida ho tensaun no inserteza boot,” dehan Prezidente Ramos Horta iha komunikadu ofisiál ne’ebé Iklik News sita husi Palásiu Prezidensiál Bairu-Pite, Segunda 26/10.
Tuir Prezidente Repúblika, ema hotu ne’ebé envolve iha planeamentu, ezekusaun, apoiu no insentivu ba aktu terror ne’e tenke lori ba justisa, atu responsabiliza sira tuir lei. Tanba violénsia hasoru sivíl sira no fatin ibada-na’in sira la bele simu, tanba ameasa ba dame, seguransa no koezaun entre komunidade relijioza sira.
Governu no povu Timor-Leste espresa solidariedade no apoiu tomak ba autoridade seguransa no judisiáriu Jordania nian iha sira nia esforsu atu investiga kazu ne’e, identifika ema hotu ne’ebé responsavel no garante katak autór sira responsabiliza tuir lei Jordania nian.
Timor-Leste reafirma nia kompromisu ba promosaun dame, respeitu ba direitus umanus, liberdade relijioza no koezaun entre komunidade sira, nu’udar valor importante atu harii sosiedade ne’ebé hakmatek no respeita malu.
Jornalista: David da Costa
