Díli, 10 Novembru 2026 (Iklik.Info) —Deputadu Bankada Popular Libertasaun Popular (PLP), husu Governu atu fó atensaun no apoiu konkretu ba família mártir Santa Cruz, liuliu inan-aman mártir Sebastião ne’ebé sei moris, no sobrevivente violénsia seksuál durante konflitu iha pasadu, liuhusi garantia asesu ba uma ne’ebé dignu, tratamentu saúde, apoiu finanseiru no oportunidade edukasaun ba sira nia oan sira.
Deputadu Bankada Popular Libertasaun Popular (PLP), Adolfo Martins hateten nian lembra kona-ba loron 12 Novembru 2026, ne’ebé sei marka komemorasaun tinan 35 ba manifestasaun Santa Cruz, ne’ebé termina ho masakre Santa Cruz, nu’udar eventu importante ida iha istória luta libertasaun nasionál Timor-Leste nian.
Maibé deputadu Bankada PLP Adolfo ne’e mós lamenta katak to’o ohin loron, monumentu 12 Novembru nian seidauk kompletu. Nia refere mos ba inisiativa Komité 12, hamutuk ho família no apoiu husi Governu, ne’ebé hala’o serimónia atu halo sepultamentu fali ba restu mortál mártir Sebastião iha oin Sentru Memorial Santa Cruz, iha loron 28 Outubru.
Maski nune’e, deputadu bankada PLP husu ba Governu atu la para de’it iha eventu serimónia, maibé kontinua fó apoiu ba inan aman mártir Sebastião ne’ebé sei moris, tanba tuir nia, sira presiza hetan atensaun husi Estadu.
Deputadu Adolfo esplika katak inan aman sira presiza uma ne’ebé dignu asesu ba tratamentu saúde, kadeira roda ba aman mártir Sebastião nian, no apoiu finanseiru atu bele enfrenta nesesidade moris loroloron.
“Tanba laiha loron 28 Outubru, sei laiha 12 Novembru, no mártir Sebastião nia inan-l aman ne’ebé sei moris agora enfrenta moris ho kondisaun miserável tebes,” dehan deputadu bankada PLP iha intervensaun debate OJE 2027 faze jeneralidade iha Parlamentu Nasionál, Tersa 10/11.
Aleinde ne’e, deputadu Adolfo Martins apela mos ba Governu atu fó atensaun ba inan feton sira ne’ebé sai vítima no sobrevivente husi violénsia seksuál no violasaun grave ba direitus umanus durante konflitu iha pasadu.
Deputadu Adolfo konsidera katak Estadu iha obrigasaun atu valoriza no rekoñese sakrifísiu vítima no sobrevivente sira ne’e, liuhusi kria kondisaun ne’ebé bele garante sira nia oan sira asesu ba dokumentu ofisiál Estadu nian, bolsa estudu, no fasilidade atu hetan kréditu.
Tuir deputadu Adolfo, medida hirak ne’e importante atu asegura katak vítima no sobrevivente sira bele sai parte integrante iha prosesu dezenvolvimentu nasionál, ho igualdade no inkluzaun.
Deputadu bankada PLP hateten, rekonsiliasaun la signifika fó oportunidade boot de’it ba ema sira ne’ebé iha diferensa polítika iha pasadu, maibé tenke hatudu kompromisu atu kontinua tau-matan ba ema vulnerável sira, liuliu sira ne’ebé sakrifika sira-nia moris no dignidade atu liberta nasaun.
“Rekonsiliasaun la signifika fó liu oportunidade boot ba ema sira ne’ebé iha diferensa polítika ho ita iha pasadu, maibé atu konsistente nafatin hodi tau-matan ba ema sira ne’ebé vulnerável liu sakrifika sira-nia vida hodi liberta rai ida-ne’e. Rai libertadu ona, ohin loron loke dalan ba ema hotu atu tuur hanesan ho luta-na’in sira,” Adolfo afirma.
Deputadu Bankada PLP, Adolfo Martins, taka nia intervensaun ho apelu ba Governu atu asegura katak polítika orsamentál no programa dezenvolvimentu nasaun nian la’ós haree de’it ba kresimentu infraestrutura no despeza Estadu, maibé tenke lori benefísiu direta ba povu, promove soberania ai-han, hametin setór produtivu, garante inkluzaun sosial no valoriza ema sira ne’ebé sakrifika-an ba libertasaun nasionál.
Jornalista: David da Costa
