DILI, 13 Outubru 2026 (I-klik Info) – Gruta Golgota ne’ebé nu’udar fatin sagradu ba sarani Katólika sira halo devosaun ba Na’i-Feto, agora sai fali fatin tara labarik nia kaan.
Adoni Carlos Mota, eskuteiru ne’ebé tau matan ba gruta ne’e, hato’o preokupasaun boot kona-ba hahalok komunidade balun ne’ebé laiha konsiénsia.
“Dalabarak ona ami hase’e ona komunidade sira ne’ebé hela besik. Ami ko’alia beibeik, maibé sira nafatin laiha neon. Sira mai barak liu iha oras madrugada wainhira ita sei toba hela,” Adoni hateten ba jornalista sira.
Tuir nia, labarik nia kaan ne’ebé tara iha ai-sukaer no ai-daak hun sira ne’e fó impaktu maka’as ba saúde tanba iis makaas iha tempu loron manas no fo impaktu Saude publiku
“Iha tempu loron manas, buat ne’e iis maka’as no difikulta tebes ba ami-nia saúde ne’ebé hein gruta ne’e, no mós ba sarani barak ne’ebé loron-loron mai halo devosaun ba Maria,” nia lamenta.
Maske parte eskuteiru tau ona avizu iha papan no halo arame hale’u ai-hun sira, komunidade kontinua lori balde ho rebo-rebo hodi tara sasan sira ne’e.
“Tinan kotuk ami hasai tiha ona, hamoos no hakoi hotu ona. Agora sira mai tara tan fali. Ita haree husi ai-hun sira ne’e la furak ona, nakonu ho balde kór oioin, ambiente sai fo’er,” nia hatutan.
Tan ne’e nia husu ba komunidade atu para hahalok ne’e no husu ba parte relevante sira atu tau atensaun no fó sansaun, tanba estraga ai-horis nia furak iha fatin públika.
Iha parte seluk, vizitante Gruta Golgota, Elvira Odete, mós la satisfaz ho aktu Komunidade refere tanba fatin ne’ebe Komunidade
“Ha’u sempre mai vizita Na’i-Feto Golgota hodi halo devosaun, no ha’u sempre haree ema tara labarik nia sasan ne’e iha sukaer hun no ai-daak sira, barak loos. Aktu ne’e fó impaktu mai ha’u no ba sarani seluk ne’ebé halo movimentu iha fatin ne’e,” Elvira konta ba I-Klik.
Nia dehan, tanba fatin ne’e fatin públiku no ema barak mak asesu hodi hasa’e orasaun, sasan ne’ebé tara iha estrada públiku ne’e iis loos no bele afeta saúde ema nia saúde.
Nia sujere ba autoridade lokál no parte relevante sira atu tau atensaun sériu ba komunidade ne’ebé tara labarik nia sasan arbiru iha dalan públiku.
Jornalista Filomena da Conceição & Joaninha Casamiro
