Dili, 23 Outubro 2026 (Iklik News) – Iha ámbitu selebrasaun aniversáriu ba dala 36 Loron Unidade Alemaña, Reprezentante nasaun rua reafirma kompromisu boot atu hametin liután relasaun bilaterál, hodi foku ba valór demokrasia, direitu umanu, no kooperasaun estratéjika ba futuru.
Embaixadór Federal Repúblika Alemaña, Ralf Beste, iha ninia diskursu, fó hanoin katak tinan 2026 sei marka tinan 25 relasaun diplomátika entre nasaun rua. Embaixadór Beste ko’alia ho sentimentu espesiál kona-ba ninia ligasaun ho Timor-Leste, ne’ebé hahú husi ninia karrera nu’udar jornalista polítiku iha tinan 1999.
“Alemaña tuir ho simpátia boot jornada Timor-Leste nian no apoia nasaun ne’e durante tinan barak, liuhosi kooperasaun dezenvolvimentu, interkámbiu universidade, harii instituisaun, to’o formasaun vokasionál,” Embaixadór Beste subliña.
Nia mós hato’o parabéns ba Timor-Leste tanba ninia progresu iha harii demokrasia ne’ebé diak, no adere ba ASEAN.
Embaixadór Beste dehan Alemaña prontu atu kontinua apoia Timor-Leste, nu’udar nasaun ne’ebé agora parte husi komunidade Sudeste Aziátiku, liuhosi kuadru kooperasaun entre Uniaun Europeia (EU) no ASEAN.
Iha parte seluk, Prezidente Repúblika, José Ramos Horta, hato’o parabéns ba governu no povu Alemaña nian ba Loron Unidade.
Prezidente Horta hateten iha loron 3 Outubru 1990 nudar triúnfu ba liberdade, demokrasia, no autodeterminasaun ne’ebé fó lisaun boot ba mundu katak divizaun ne’ebé kle’an liu mós bele manán liuhosi kompromisu ba dame.
“Istória Alemaña nian lori sentidu ne’ebé espesiál tebes. Ami-nia istória no jeografia bele diferente, maibé ami fahe komprensaun kle’an ida katak dame tenke harii iha dignidade umana no reconciliasaun ho respeitu,” Prezidente Horta hateten.
Prezidente Horta aproveita oportunidade ne’e hodi agradese ba apoiu ne’ebé Alemaña fó ona ba Timor-Leste, liuliu iha setór marítiimu, hanesan apoiu ba ró Nakroma (Berlin) no mós apoiu iha setór agrikultura no edukasaun.
Nia hateten Timor-Leste foka hela ba estabilizasaun rai no dezenvolvimentu ekonómiku, no hein katak parseria ho Alemaña bele ajuda diversifika nasaun nia ekonomia, liuliu liuhosi área teknolojia no inovasaun ambientál.
Eventu ne’ebé partisipa husi membru Parlamentu Alemaña (Bundestag) no reprezentante sira husi kór diplomátika, instituisaun governu no sosiedade sivil.
Iha ikus Prezidente Horta hateten, Alemaña no Timor-Leste sei sai forte liután, hodi kontribui ba mundu ne’ebé dame, justu no sustentável.
Jornalista: Zevonia Vieira
