Díli, 9 Novemberu 2026 (Iklik.Info) — Primeiru Ministru (PM), Kay Rala Xanana Gusmão, hateten Governu aumenta finansiamentu ba munisípiu 13 iha Orsamentu Jerál Estadu (OJE) 2027, ho montante US$ 148,1 millaun, aumenta liu 20% kompara ho 2025, atu garante dezenvolvimentu ekitativu no hadi’a asesu komunidade sira ba servisu públiku iha territóriu tomak, inklui área foho, tasi-ibun, Ataúru no Oe-Kuse Ambenu.
Primeiru Ministru Xanana Gusmão dehan asesu família ida ba servisu públiku la bele depende de’it ba nia proximidade ho Díli. Tanba ne’e dezenvolvimentu tenke to’o ba komunidade iha foho, tasi-ibun, Ataúru no Oe-Kuse Ambenu. Finansiamentu ba munisípiu 13 aumenta ba US$ 148,1 millaun, ho aumentu liu 20% kompara ho 2025.
Se konsidera dotasaun munisipál hotu ne’ebé prevé iha orsamentu, dotasaun kombinada ba munisípiu sira no Oe-Kuse Ambenu atinje US$ 171,6 millaun, ho aumentu 6% kompara ho 2026.
“Programa Nasionál Dezenvolvimentu Suku simu US$ 22,9 millaun ba projetu dezenvolvimentu komunitáriu,” dehan Primeiru Ministru Xanana Gusmão Bainhira halo aprezentasaun iha diskusaun OJE 2027 nian faze Jeneralidade iha Parlamentu Nasionál, Segunda 9/10.
Aleinde ne’e, PM Xanana Gusmão hateten, osan US$ 33,8 millaun sei ezekuta husi autoridade Munisipál liuhusi Programa Integradu Dezenvolvimentu Munisipál, atu apoia infraestrutura no programa dezenvolvimentu lokál.
“Medida hirak ne’e besik liután ba desizaun ne’ebé foti iha komunidade. Maibé, presiza mós kapasidade lokál atu halo planu, realiza konkursu, fiskaliza obra no presta kontas,” Xanana Gusmão Subliña.
Desentralizasaun bele hetan susesu bainhira responsabilidade ne’ebé aumenta akompaña ho rekursu no meiu atu hala’o servisu ho kualidade.
“OJE 2027 konsagra besik US$ 277,9 millaun ba investimentu kapitál iha projetu 1.643 iha munisípiu sira no Oe-Kuse Ambenu, la inklui projetu Ministériu Obras Públikas nian,” dehan Xanana Gusmão.
Montante ne’e hatudu distribuisaun territorial investimentu tuir planu, no la’ós transferénsia adisionál ba orsamentu munisipál.
Jornalista: David da Costa
