Díli, 27 Outubru 2026 (Iklik.Info) — Programa Voluntáriu Austrália nian selebra aniversáriu ba dala-75 ho tema “Tinan 75 ho Voluntáriu sira ne’ebé Kria Parseria ne’ebé Dura”, hamutuk ho voluntáriu Australianu sira ne’ebé servisu iha rai li’ur, inklui Timor-Leste, hodi rekoñese kontribuisaun voluntáriu sira ba dezenvolvimentu sustentável no hametin relasaun entre nasaun rua.
Eventu ida ne’e halibur reprezentante sira husi Governu Timor-Leste, Embaixada Austrália, organizasaun parseiru sira, parseiru dezenvolvimentu sira, voluntáriu atuál no voluntáriu sira ne’ebé remata ona sira nia servisu, hodi reflete kona-ba impaktu ne’ebé dura husi parseria voluntáriu entre Austrália no Timor-Leste.
Selebrasaun ne’e mós rekoñese kooperasaun voluntáriu iha Timor-Leste ne’ebé hala’o ona durante liu tinan 30, no legadu husi Programa Voluntáriu Austrália nian iha rai li’ur, ne’ebé to’o ona tinan 75.
Iha selebrasaun ne’e, hala’o diskursu ofisiál, aprezenta testemuña husi voluntáriu no parseiru sira, hatudu vídeo no organiza espozisaun imajen sira ne’ebé hatudu istória no rezultadu servisu voluntáriu Australianu sira iha Timor-Leste.
Selebrasaun ida ne’e destaka kontribuisaun husi voluntáriu sira, organizasaun parseiru, instituisaun governamentál no komunidade sira ne’ebé servisu hamutuk hodi apoia dezenvolvimentu sustentável no haburas ligasaun ne’ebé dura entre Austrália no Timor-Leste.
Partisipante sira mós rona istória sira ne’ebé hatudu oinsá parseria voluntáriu sira kontribui ba hametin organizasaun, transferénsia abilidade, dezenvolvimentu lideransa no rezultadu dezenvolvimentu sustentável iha nasaun tomak.
Dezde tinan 1990, voluntáriu Australianu na’in 820 resin mak servisu ona iha Timor-Leste, hamutuk ho organizasaun parseiru na’in 197 resin iha setór governu, sosiedade sivíl, edukasaun, saúde, infraestrutura no dezenvolvimentu komunitáriu.
Parseria hirak ne’e ajuda hametin instituisaun sira, harii kapasidade forsa traballu nian no apoia inisiativa dezenvolvimentu sira ne’ebé lidera husi komunidade no instituisaun lokál iha nasaun tomak.
Bainhira ko’alia iha selebrasaun aniversáriu ne’e, Embaixadora Austrália nian iha Timor-Leste Caitlin Wilson hateten importánsia voluntáriu sira nia knaar atu hametin parseria ne’ebé dura entre Austrália no Timor-Leste.
Embaixadora Austrália Caitlin mós dehan, dezde tinan 1990, voluntáriu Australianu na’in 820 resin no sira nia família apoia ona organizasaun parseiru na’in 197 resin iha Timor-Leste.
“Hun husi programa ne’e mak ema no relasaun parseria. Ida-ne’e hanesan espresaun umana husi kooperasaun dezenvolvimentu Austrália nian”, Embaixadora Caitlin Wilson dehan iha komunikadu ne’ebé Iklik News sita husi página média Embaixada Austrália nian ohin.
Embaixadora Caitlin mós hateten, espíritu servisu, solidariedade no respeitu mútuu ne’ebé marka jornada voluntáriu sira-nian sei kontinua hametin parseria entre Austrália no Timor-Leste iha tinan sira tuirmai.
Iha fatin hanesan, Diretór Rejionál Ázia-Pasífiku no Papua-Nova Guiné husi Australian Volunteers International (AVI), Jonathan Hunter, reflete kona-ba impaktu ne’ebé dura husi parseria voluntáriu sira iha rejiaun tomak, inklui Timor-Leste.
Hunter dehan, programa voluntáriu iha Timor-Leste hatudu ona oinsá parseria forte sira bele lori dezenvolvimentu sustentável no mudansa signifikativa.
“Enkuantu voluntáriu Australianu sira kontribui iha kapasidade téknika no profisionál ne’ebé iha valór, sira nia knaar komplementa koñesimentu no kapasidade ezistente husi ita-nia organizasaun parseiru sira”, dehan Hunter.
Hunter esplika, dala barak, rezultadu ne’ebé dura liu mak relasaun sira ne’ebé voluntáriu harii ho maluk sira iha nível lokál, organizasaun no komunidade tomak.
Hunter mós subliña, ligasaun entre povu husi nasaun rua ne’e haburas aprendizajen no komprensaun mútuu, hasa’e kapasidade lokál no husik legadu amizade ne’ebé kontinua dura.
Tanba ne’e voluntáriu sira nia kontribuisaun la’ós de’it iha área profisionál no téknika, maibé mós iha harii relasaun ne’ebé kontinua nafatin maski sira-nia períodu servisu nu’udar voluntáriu remata ona.
Relasaun hirak ne’e kontinua haforsa kolaborasaun no amizade entre komunidade no instituisaun sira iha Austrália no Timor-Leste.
Kona-ba Programa Voluntáriu Austrália
Programa Voluntáriu Austrália mak inisiativa husi Governu Austrália ne’ebé apoia ema Australianu sira ho abilidade no esperiénsia atu servisu hamutuk ho organizasaun iha nasaun parseiru sira.
Programa ne’e nia objetivu mak kontribui ba prioridade dezenvolvimentu ne’ebé lidera iha nível lokál no hametin ligasaun entre ema sira.
Iha Timor-Leste, programa ne’e implementa husi Australian Volunteers International (AVI), ne’ebé servisu hamutuk ho organizasaun parseiru sira iha governu, sosiedade sivíl, edukasaun, saúde no setór dezenvolvimentu komunitáriu, hodi apoia rezultadu dezenvolvimentu sustentável no hametin kapasidade lokál.
Jornalista: David da Costa
