Díli, 26 de Outubro de 2026 (I-KLIK.INFO)-Polísia Nasionál Timor-Leste (PNTL) Liuhusi Komandu Munisípiu Díli prepara ona planu seguransa ba selebrasaun loron finadu ne’ebé sei monu iha lorob 1 no 2 fulan Novembru atu fó atensaun espesiál ba fatin sira ne’ebé konsidera iha risku konflitu, liu-liu iha semitériu sira iha Díli laran, nune’e parte FALINTIL Forsa Defeza Timor Leste (F-FDTL) mos sei koopera ho parte PNTL atu halo seguransa hodi garante situasaun ne’ebé seguru ba selebrasaun loron matebian iha teritorio nasionál.
Komandante PNTL Munisípiu Díli Komisariu Assitente Orlando Gomes dehan, implementasaun planu seguransa ne’e sei envolve membru polísia nasionál sira maka Unidade Espesiál Polísia, Polísia Marítima inklui mos apoiu husi Forsa Defeza Timor-Leste (F-FDTL), atu garante seguransa no orden públika durante selebrasaun loron finadu.
“Ita sei koloka membru sira iha semitériu sira ne’ebé iha área risku apoiu mós sei mai husi Unidade Espesiál Polísia, Polísia Marítima no Forsa Defesa Timor-Leste, atu hamutuk garante seguransa durante Loron Finadu,” dehan Komandante Munisípiu Díli Komisariu Assitente Orlando Gomes ba jornalista sira iha Motael, (26/10).
Komisariu Assitente Orlando Gomes dehan tan, komandu munisípiu Díli identifika ona simitériu balu ne’ebé konsidera iha risku konflitu, tanba ne’e, membru polísia sira sei koloka iha fatin hirak-ne’e atu monitoriza no mantein situasaun seguransa.
“Ami identifika ona simiteriu balu ne’ebé mak sempre risku ba konflitu, ida ne’e mak ami atu koloka membru sira atu asegura situasaun iha ne’eba,” Informa Komandante Orlando.
Komisariu Assitente Orlando Gomes mós apela ba juventude no komunidade tomak atu selebra Loron Finadu ho responsabilidade, liu-liu bainhira vizita rate no simitériu sira atu tau ai-funan no hato’o homenajen ba matebian sira, nune’e mós joven sira atu evita konsumu tua iha área simitériu sira, tanba hahalok ne’e bele hamosu situasaun ne’ebé la seguru no afeta ema ba seluk.
“Komandu Munisípiu Díli hakarak apela ba joven sira katak ita iha konsiensia atu selebra loron finadu hodi ai-funan ba iha rate atu fó homenajen ba ita nia matebian sira, la’os ita ba hemu fali tua iha simiteriu sira tanba bele provoka situasaun seguransa iha simiteriu sira no bele afeta mós ba ema seluk” nia apela.
Nia afirma tan, se iha aktu krime ne’ebé akontese, autoridade kompetente sei halo asaun tuir lei no prosedimentu ne’ebé vigora, atu garante katak situasaun iha simitériu sira nafatin hakmatek no seguru.
“Kuandu temi ona aktu krime ita la tolera, ita tenki halo asaun ida rigorozu para ita prosesu, tanba ita hakarak situasaun iha simitériu sira hakmatek” nia dehan.
Sorin seluk Vise-Xefe Estadu Maior Jenerál F-FDTL, Major Jenerál Calisto dos Santos ‘Coliati’ dehan, atividade seguransa ba Loron Finadu nu’udar atividade rutinária ne’ebé kada tinan hala’o hamutuk entre F-FDTL no PNTL, liu-liu iha Sidade Díli no munisípiu sira nune’e iha Munisípiu sira, forsa seguransa koloka ona no sei kordena hamutuk ho PNTL atu garante komunidade bele selebra Loron Finadu ho hakmatek.
Koliati mós subliña katak, maski autoridade sira prepara ona medida seguransa atu mantein estabilidade, bele iha individu irresponsável balu ne’ebé buka atu kria instabilidade. Tanba ne’e, polísia tenke atua tuir lei no regra sira ne’ebé vigora iha Timor-Leste, ho apoiu husi F-FDTL, atu mantein orden públika no garante seguransa ba komunidade.
“Kuandu tau ona seguransa atu bele hetan estabilidade nune’e ema hotu bele hala’o loron ne’eba ho di’ak, maibé iha individu ruma irresponsavel, iha malandru ka bandidu ruma buka atu kria kondisaun ne’ebé instabilidade iha momentu ida ne’eba, sein duvida Polísia tenki atua tuir regras no lei ne’ebé prevalese iha ita nia rai, no F-FDTL sempre apoia Polísia atu bele garante estabilidade ida ne’e” konklui Koliate.
Jornalista: Silvino Freitas
