Díli, 24 Out Outubru 2026, (Iklik.Info) — Diresaun Nasionál Meteorolojia no Geofízika (DNMG) Timor-Leste alerta katak ahi suar foun ne’ebé mai husi atividade sunu rai iha Papua Osidental, Indonézia, bele tama mai Timor-Leste no afeta kualidade ár, hamutuk ho redusaun vizibilidade, hahú husi Domingu, loron 25 Outubru, to’o Kuarta-feira, loron 28 Outubru 2026.
Iha komunikadu ne’ebé Iklik News sita husi pagina ofisiál Facebook Diresaun Nasionál Meteorolojia no Geofízika (DNMG) Timor-Leste katak alerta kona-ba ahi suar foun husi keimadas bele tama mai Ilha Timor durante loron 25 to’o 29 Outubru 2026.
Diresaun Nasionál Meteorolojia no Geofízika (DNMG) fó avizu ba públiku kona-ba posibilidade ahi suar foun husi atividade sunu rai iha Papua Osidental, Indonézia, atu tama mai Timor-Leste, hahú iha Domingu lokraik.
Tuir análize, kondisaun ahi suar sei kontinua to’o Kuarta-feira, loron 28 Outubru. Iha períodu ne’e, ahi suar bele afeta negativamente kualidade ár no hamenus vizibilidade kuaze iha territóriu Timor-Leste tomak.
Kondisaun ne’e previstu sei hahú di’ak fali husi Quinta-feira, loron 29 Outubru 2026, durante períodu lokraik to’o inísiu kalan.
DNMG Alerta Públiku atu Prevene Risku Saúde Durante Períodu Ahi Auar iha TL
DNMG rekomenda ba públiku atu evita atividade fízika iha li’ur bainhira ahi suar barak. Públiku mós tenke taka odamatan no janela atu hamenus ahi suar tama ba uma.
Labarik, ema idozu, inan isin-rua, no ema ne’ebé sofre moras respiratóriu ka moras fuan, tenke hetan kuidadu adisionál. Bainhira presiza, uza máskara apropriada, hanesan N95.
Se sente susar dada i’is ka moras iha hirus-matan, públiku tenke buka asisténsia médika imediatamente.
DNMG sei kontinua monitoriza evolusaun kondisaun meteorolójika no fó informasaun atualizada bainhira iha mudansa signifikativa ruma.
Jornalista: David da Costa
