Baucau, 23 Outubru 2026, (Iklik.Info) — Iha atividade diseminasaun Planu Asaun Nasionál Rezolusaun Konsellu Seguransa Nasoins Unidas 1325 (PAN RKSNU 1325), ho tema “Promove Partisipasaun Feto iha Paz, Seguransa no Prevensaun Konflitu”, iha suka Builai Postu Administrativu Baucau Vila, Munisípiu Baucau Ministériu Interiór (MI) enkoraja feto no juventude atu sai ajente transformadór ba dame no seguransa, liuhusi partisipasaun ativa iha prevensaun no rezolusaun konflitu, no prosesu foti desizaun iha komunidade.
Iha komunikadu ne’ebé Iklik News sita katak, iha loron 21 Outubru ne’e, Ministériu Interiór (MI), liuhusi Diresaun Jerál Seguransa no Prevensaun Konflitu (DGSPC) atraves Diresaun Nasionál Prevensaun Konflitu Komunitária (DNPKK), kontinua implementa Planu Asaun Nasionál, Rezolusaun Konsellu Seguransa Nasoins Unidas (PAN RKSNU 1325) kona-ba Feto, Paz no Seguransa, liuhusi atividade diseminasaun ba komunidade iha Baucau, iha kuadru implementasaun faze daruak PAN 1325.
Iha atividade ne’e ho tema “Promove Partisipasaun Feto iha Paz, Seguransa no Prevensaun Konflitu”, ho objetivu atu hametin koñesimentu komunidade kona-ba direitu feto, promove partisipasaun feto no juventude iha prosesu foti desizaun, no hasa’e sira nia papél iha prevensaun no rezolusaun konflitu, nune’e bele kontribui ba harii dame no dezenvolvimentu sustentável.
Diretór-Jerál Seguransa no Prevensaun Konflitu (DJSPK), Gaspar Sousa Pereira (Sordou), hateten, implementasaun PAN 1325 presiza partisipasaun ativa husi komunidade tomak, liuliu feto no juventude sira
“Ohin ami mai iha ne’e atu fahe informasaun ba komunidade no juventude, kona-ba oinsá sira bele sai ajente transformadór ba dame no seguransa, liuliu garante no asegura feto no labarik-feto nia direitu fundamental hotu protejidu husi violensia ka deskriminasaun,” dehan Gaspar iha komunikadu ofisiál ne’ebé Iklik News sita husi pagina Servisu Relasaun Públika Ministériu Interiór nian ohin Sexta 23/10.
Gaspar esplika, implementasaun PAN 1325 presiza kontinuidade iha sensibilizasaun no mobilizasaun komunidade, atu feto sira bele partisipa ativu iha vida polítika, lideransa no prosesu foti desizaun, la’ós limita de’it ba knaar iha uma laran.
“Feto la’ós atu hela de’it iha uma laran, maibé iha direitu no kapasidade atu lidera, foti desizaun no kontribui ba dezenvolvimentu nasaun. Tanba ne’e, ami enkoraja partisipante sira atu fahe fila-fali koñesimentu ne’ebé hetan ba feto no komunidade seluk,” Gaspar afirma.
Gaspar Sousa Pereira mós husu ba partisipante sira atu aproveita oportunidade ne’e, habelar informasaun ba kolega sira ne’ebé la konsege partisipa, no hametin komprensaun katak igualdade jéneru no partisipasaun feto sai elementu importante iha harii sosiedade ne’ebé justu, inkluzivu no hakmatek.
Iha fatin hanesan, Komandante Eskuadra PNTL Baucau Vila Interinu, Inspetór Asistente Polísia Abel da Costa Fraga, hateten, situasaun konflitu iha Suku Builai, ne’ebé antes akontese dala barak, agora komesa menus.
Abel konsidera atividade sensibilizasaun hanesan oportunidade importante atu hametin koñesimentu komunidade kona-ba sira nia responsabilidade iha prevensaun konflitu no promove kooperasaun ho autoridade seguransa.
“Ami husu ba komunidade atu kontinua koopera ho autoridade seguransa, hodi hametin dame, hakmatek no seguransa, nune’e ita hotu bele kontribui ba dezenvolvimentu Munisípiu Baucau,” Abel dehan.
Nune’e mós Administradór Postu Administrativu Baucau Vila, Aires de Fátima Correia, haktuir mós feto iha Munisípiu Baucau hatudu ona kontribuisaun importante iha área lideransa no administrasaun públika.
Tanba partisipasaun feto iha pozisaun importante, inklui lideransa iha estrutura Munisipál, justisa no xefia suku, nu’udar ezemplu katak feto iha kapasidade atu asume responsabilidade no kontribui ba dezenvolvimentu.
“Diseminasaun PAN 1325 ne’e importante atu garante katak direitu feto hanesan ho mane, promove igualdade entre feto no mane, no fó oportunidade ba feto atu asume papel lideransa iha sosiedade,” hateten Aries.
Enkuantu, Veterana Maria Celeste, iha ninia intervensaun mós hateten presiza tebes promove diálogu ho juventude no komunidade atu rona diretamente sira nia hanoin, prioridade no kompromisu kona-ba dezenvolvimentu no prevensaun konflitu.
”Hanesan sobrevivente ami sujere atu halo maka diálogu inkluzivu nune’e bele ajuda halibur ideia no hanoin konstrutiva husi joventude ne’ebé bele sai baze ba asaun konkretu hodi prevene konflitu no hametin dame sustentável”, sujere Veterana Maria.
Xefe Suku Builai, Juvinal R. da Costa, hateten, importánte tebes atu rona feto nia lian no fó oportunidade ba feto atu partisipa iha lideransa no prosesu foti desizaun.
Tanba ne’e Xefe Suku Juvinal husu ba komunidade atu kontinua transmite informasaun ne’ebé hetan liuhusi atividade ne’e, hodi hasa’e koñesimentu membru konsellu suku no motiva sidadaun sira atu hametin unidade, solidariedade no kooperasaun.
Xefe Suku Juvinal mós agradese ba Ministériu Interiór, liuhusi DGSPC no DNPKK, tanba hili Suku Builai nu’udar fatin ba diseminasaun informasaun kona-ba PAN 1325, ne’ebé konsidera importante atu hametin kapasidade komunidade iha prevensaun konflitu no harii dame.
Implementasaun PAN 1325, liuliu iha faze daruak, reflete kompromisu Governu atu kontinua promove partisipasaun signifikativa feto iha prosesu dame no seguransa, hametin protesaun ba feto no labarik-feto, no dezenvolve mekanizmu prevensaun konflitu ne’ebé inkluzivu, ho envolvimentu ativa husi komunidade no autoridade lokál.
Liuhusi atividade sira hanesan ne’e, Ministériu Interiór, liuhusi DGSPC no DNPKK, kontinua hametin koñesimentu públiku no mobiliza komunidade atu sai parseiru ativu iha implementasaun PAN 1325, hodi kontribui ba sosiedade ne’ebé seguru, inkluzivu no hakmatek iha Timor-Leste.
Jornalista: David da Costa
