Dili, 23 Outubru 2026 (I-Klik Info) – Kandidatu balu ne’ebé la pasa iha selesaun dokumentu ba vaga Rejime Kareira Espesiál Hospital Nasional Guido Valadares (HNGV) kestiona mosu irregularidade ka korrupsaun, Koluzaun no Nepotizmu (KKN), ne’ebé boot no halo diskriminasaun ba Timor-oan balun neebe kompetensi iha vaga refere.
Almeida esplika, vaga refere loke husi HNGV ne’ebé hamahan an iha Ministériu da Saúde iha loron 07 Setembru 2026 hodi presiza rekrutamentu hamutuk 478 pesoal ba Bloku Pediatria HNGV.
“Ami ne’ebé iha área pesoal saúde halai malu durante loron 10 hahu husi 07 to’o 18 Setembru 2026 ba senamalu iha Hospital Antonio de Carvalho Lahane hodi submete dokumentu tuir rekezitus ne’ebé fó sai ona. Total ema ne’ebé submete dokumentu hamutuk 8.084, kestaun ne’e hato’o husu”, Porta Voz kandidatu, Almedia Soares liuhusi konferénsia imprensa, Kinta-feira ohin iha Jardin 05 de Maio.
Nia hatutan, iha loron 11 Outubru 2026, HNGV publika rezultadu selesaun dokumentu. Husi total 8.084, iha 4.537 mak selesionadu no 3.437 mak la admitidu.
Hafoin ne’e, HNGV fó sai avizu katak ba sira ne’ebé la pasa bele halo karta reklamasaun/rekursu. Total ema ne’ebé halo reklamasaun hamutuk 1.645 pesoal. Iha loron 20 Outubru 2026, HNGV publika fila fali rezultadu reklamasaun liuhusi pájina Facebook ofisiál HNGV, katak husi 1.645 ne’e, 61 deit mak admitidu fila fali, no 1.584 nafatin la admitidu
Tuir Almeida, rezultadu reklamasaun ne’e halo kandidatu sira sente insatisfaz tanba deskonfia mosu irregularidade no KKN ne’ebé boot ho faktus hanesan tuir mai:
“Husi, área Tekniku Nutrisaun, pesoal ida ho naran Nelcia da Silva da Costa, hela fatin Becora, Nu. Kartaun Eleitoral 000838624. Nia naran la iha iha lista Admitidu no mos la iha iha lista La Admitidu iha faze dahuluk, maibe ikus mai nia naran liu fali iha lista Rekursu Admitidu Nú. 2.”, esplika, portavoz Almedia
Husi área Tekniku Medical Record, pesoal ida ho naran Steven Nandino M. da Costa, hela fatin Becora/Clak Fuik, Nu. Kartaun Eleitoral 000990429. Nia naran iha lista La Admitidu Nú. 87 tanba problema 4 hanesan: La submete Kartaun Profisionál, Sertifikadu Bom Komportamentu la asina, Karta Aplikasaun la asina no CV la asina. Maibe hafoin halo reklamasaun, nia mesak mak liu fila fali, kompara ho kandidatu seluk ne’ebé problema deit mak Bom Komportamentu la asina maibe halo reklamasaun nafatin la liu.
“Sira nia kolega Mario Pereira, husi área Tekniku Nutrisaun, submete dokumentu kompletu iha Hospital Antonio de Carvalho Lahane no simu resibu husi funsionáriu atendimentu, maibe nia naran la iha iha lista Admitidu no mos la iha iha lista La Admitidu”, Nia Esplika
Sira ne’ebé liu fila fali iha lista reklamasaun/rekursu, antes ne’e sira La Admitidu tanba maioria iha problema hanesan ho kandidatu sira ne’ebé la liu, maibe sira mesak mak liu.
Ho pontu sira ne’e, kandidatu sira husu ba Prezidente Juri Dr. Vidal de Jesus Lopes ho ekipa tomak atu deklara ba publiku:
“Tanba sa mak ema ne’ebé nia naran la iha iha lista Admitidu no La Admitidu, konsidera la tuir vaga, maibe ikus mai liu fali iha lista reklamasaun/rekursu, Tanba sa mak ema ne’ebé iha problema 3 to’o 4 mak liu fali hafoin reklamasaun, enkuantu ema sira ne’ebé problema kiik deit mak la liu” Nia Lamenta
Nune’e mos sira husu ba entidade relevante sira hanesan PDHJ, Sosiedade Sivil, Parlamentu Nasionál no Primeiru Ministru atu fó atensaun imediata ba aktu sira hanesan ne’e iha instituisaun Estadu nia laran.
Journalist, Joanina Casamiro
