Díli, 16 Outubru 2026 (Iklik.Info) — Prezidente Repúblika (PR) José Ramos-Horta husu atu garante ambiente seguru no independente ba jornalista sira atu bele hala’o sira nia kna’ar ho responsabilidade no profesionalizmu. Apelu ne’e hato’o iha komemorasaun Loron Nasionál Liberdade Imprensa, nu’udar forma atu reafirma importánsia liberdade imprensa, liberdade espresaun no asesu ba informasaun iha konsolidasaun demokrasia iha Timor-Leste.
Prezidente Ramos-Horta hateten, Iha loron boot ida ne’e, loron Nasionál Liberdade Imprensa 16 Outubru, nu’udar Xefe Estadu hakarak reafirma fila fali dala ida tan, iha kompromisu metin ho liberdade imprensa, liberdade ko’alia nian, liberdade espresaun, ne ‘ebe hanesan prinsipiu ne’ebe importante tebe-tebes ba konstrusaun no konsolidasaun estadu demokratiku.
“Respeita ba kontribuisaun jornalista sira no mídia sira seluk ne’ebe sira fornese informasaun ba publiku, tanba sira nia kna’a fahe informasaun, informasaun ne’ebe di’ak ho integridade, promove debate, partisipasaun sidadaun sira i nune’e kontribui haforsa ba transparansia iha vida públiku,” dehan Prezidente Ramos-Horta iha video badak ne’ebé Iklik News sita husi página ofisiál Facebook Prezidente Repúblika nian ohin, Sexta 16/10.
Prezidente Ramos-Horta haktuir, nu’udar Xefe Estadu mớs apela ba jornalista no instituisaun midia sira hotu-hotu atu kontinua halo kna’ar ho responsabilidade, ho matenek, ho indepedensia, ho profesionalizmu, ho respeitu ba etika jornalistika.
Prezidente Ramos-Horta subliña, importante tebe-tebes hotu-hotu garante ambiente ne’ebe seguru, favoravel ba iornalista sira, atu sira bele halo sira nia kna’ar asesu ba informasaun protesaun fontes informasaun, integridade profesional tuir lei no prinsipiu demokratiku.
“Nu’udar xefe Estadu ha’u enkoraza ba instituisaun estadu, media organizasaun jornalista, sosiedade sivil, sidadaun sira hotu, atu hametin kultura dialogu, toleransia, pluralizmu no respeitu ba opiniaun ruma ne’ebe oin seluk husi ita nian,” dehan Prezidente Ramos-Horta
Prezidente Ramos-Horta halo apelu ba públiku atu uza mídia no plataforma dijitál ho responsabilidade, liuliu iha esforsu atu kombate desinformasaun. Nia konsidera katak utilizasaun mídia ho responsabilidade importante atu proteje kualidade debate públiku no hametin konfiansa sidadaun sira nian ba informasaun.
“Ha’u halo apelu, para ita uza media no plataforma dijital ho responsabilidade, liu-liu iha kombate dis- informasaun, disiminasaun informasaun falsu hodi ita bele proteze kualidade debate públiku, no konfiansa sidadaun sira nian ba informasaun,” Prezidente Ramos-Horta konklui.
Mensajen Prezidente Repúblika nian iha komemorasaun Loron Nasionál Liberdade Imprensa ne’e reforsa importánsia liberdade imprensa nu’udar pilar fundamental iha sistema demokrátiku, no nesesidade atu jornalista sira bele hala’o sira nia kna’ar ho independénsia, seguru no responsabilidade, hodi asegura públiku hetan informasaun ne’ebé loos no konfiável.
Jornalista: David da Costa
