DILI – 16 outubro-2026 (I-klik Indo) – ohin, Timor-Leste selebra Loron Nasional Liberdade Imprensa ho tema “Hametin Demokrasia, Indepedensia no Responsabilidade Media” Loron ida ne’e la’os de’it selebrasaun ba profisaun jornalista nian, maibé mós momentu importante atu hanoin hikas istória, sakrifisiu no responsabilidade hodi prezerva liberdade ne’ebé nasaun hetan.
Iha selebrasaun ne’e, hanoin fali akontesimentu istoriku iha 16 Outubru 1975, bainhira jornalista na’in-lima ne’ebé ohin loron koñese ho naran Balibo Five lakon sira-nia vida iha Balibó, munisípiu Bobonaro, bainhira sira hala’o misaun jornalizmu atu informa mundu kona-ba situasaun Timor-Leste nian.
“Sira-nia istória sai memória importante ba liberdade imprensa no direitu ba informasaun. Ita hanoin sira ho gratidaun no respeitu,” dehan iha Padre Deolindo de Andrade Iha igreja Motael
“Iha Evangelho ohin nian, Jesus fó hanoin ba ninia dixípulu sira atu kuidadu ho hipokrizia ka moris falsu, tanba buat ne’ebé subar, loron ida sei sai nakloke. Mensajen ne’e iha ligasaun klean ho misaun jornalista sira nian”, dehan Padre Deolindo
Misaun jornalista nian la’os atu fó ksolok, sai people pleaser, defende de’it ema ne’ebé iha podér, ka buka popularidade. Misaun loloos mak buka verdade, verifika faktu no informa ba públiku ho responsabilidade. Bainhira informasaun sai instrumentu atu subar verdade no manipula públiku, konfiansa públika sei lakon.
Istória hatudu katak verdade folin karun. Jornalista sira iha tempu luta ba independénsia hatudu katak informasaun bele sai ponte entre povu ne’ebé sofre no mundu ne’ebé presiza rona. Ohin, iha nasaun independente no demokrátika, liberdade la’os buat ne’ebé simu dala ida remata. Liberdade presiza kuidadu, proteje no uza ho responsabilidade.
Liberdade imprensa la signifika bele publika informasaun sem verifikasaun, habelar rumór ka estraga ema seluk nia dignidade. Iha era rede sosiál no intelijénsia artifisiál, informasaun to’o lalais ba ema barak, maibé la’os hotu lialoos. Tanba ne’e, jornalista presiza verifika antes publika, rona parte relevante sira no destinge faktu husi opiniaun.
“Demokrásia metin la depende de’it ba liberdade atu ko’alia, maibé mós ba responsabilidade atu ko’alia ho verdade,” Nia esplika
Nia konklui jornalista sira hotu atu Maromak fó matenek, korajen no integridade iha sira-nia misaun, atu nune’e liberdade ne’ebé ema goza mak liberdade loloos.
