Dili, 21 de Setembro de 2026 (I-Klik.info): Membru Pesoal Investigador husi Komisaun Anti Korupsaun (KAK) nain 27 tuir formasaun teknika no taktika polísial iha Sentru Formasaun Akadémia Polísia Nasionál Timor Leste (CFA-PNTL) Komoro, formasaun ne’e ligadu ho servisu investigador KAK nian ne’ebé halo iha terenu hodi bele iha koñesimentu bazika polísial nian kuandu hetan agresaun fizika bainhira halo servisu atuasaun iha terenu.
Komisariu KAK Rui dos Santos dehan, investigador sira neebe sai formandu iha formasaun refere mai husi investigador primera segunda no terseira klase no investigador terseira klase ne’e rekruta iha tinan kotuk ne’ebé seida’uk simu formasaun bazika kona-ba polisial nian no restante simu ona formasaun balun, nune’e investigador sira ne’ebé husi orgaun polísia kriminal espesializada tenke iha koñesimentu teknika polísia nian oinsá atu kaptura, dezarma, tratamentu ba pesoal sira ne’ebé KAK suspeita ba kazu sira nomos bele kontra fizika ba impedimentu servisu KAK nian iha terenu tanba ne’e formasaun bazika polísia nian investigador KAK sira presiza tebes.
“Matenek balun polísia nian dalaruma ami laiha tanba ne’e mak mai iha sentru formasaun ne’e atu kompleta matenek nee iha sira atu nune’e aliende matenek ne’ebé investiga kazu korupsaun ne’e maibé matenek jerál polísia nian sira presiza iha” dehan Komisariu KAK Rui dos Santos iha serimónia abertura ba formasaun iha sentru formasaun polísia akadémia Komoro, (21/9).
Komisariu Rui dehan tan, investigador sira ne’ebé tuir formasaun ne’e balun hanesan eis polísia ne’ebé dadaun ne’e haknaar an iha KAK hanesan investigador nune’e sira iha koñesimentu bazika polísia nian maibé balun ne’ebé la’ós polísia presiza tebes servisu taktika polísia nian atu bele enrikese sira wainhira halo servisu atuasaun iha terenu, tanba KAK hanesan orgaun polísia kriminal espesializada maibé dalaruma tanba menus iha matenek polísia nian tanba ne’e presiza formasaun ba membru sira atu bele iha koñesimentu bazika tenknika polísial nian.
Entretantu reprezentante Komisariu Jerál PNTL Komadante Komandu Operasaun PNTL Komisariu Assitente Armando Monteiro dehan, formasaun refere lao durante semana rua ne’ebé nune’e husi formasaun ne’e materia teknika no taktika polísial nian ne’ebé sei fahe husi formandor sira ba formandu sira ne’ebé barak liu mak pratika ho pursentu ualu nulu no iha teoria balun ne’ebé ho pursentu rua nulu, nunee tempu limitadu atu pesoal investigador sira atu aprende materia pazika teknika polísial nian maibe investigador sira ne’ebé tuir formasaun refere prontu ona atu partisipa ativu no masimu too finál.
“Fizika ne’e maneira atu lori ema kontrola ema tanba knaar ne’ebé KAK halo nee uniku no espesifiku liga liu ba kazu ne’ebé krime grave tanba ne’e mak sira mos tenke iha kapasidade no abilidade atu kontrolu, laos atu aprende ema tuku mai ita mos tuku ba lae no tebe mai ita mos tebe ba, mais oinsa atu bele halo atudefeza ba ninia an kuandu agresaun kazu ne’ebé ita nia pesoal sira halo sira nia knaar iha terenu” dehan reprezentante Komisariu Jerál PNTL Komadante Komandu Operasaun PNTL Komisariu Assitente Armando Monteiro iha Sentru Formasaun Akadémia Polísia Komoro.
Jornalista: Silvino Freitas
