Díli, 17 Setembru 2026 (Iklik.Info) – Primeiru Ministru Kay Rala Xanana Gusmão hateten, Prezidente Repúblika José Ramos-Horta aban sei hala’o viajen ba Nova Iorke, Estadus Unidus, atu partisipa iha Nasaun Unidas (ONU), no sei lori pozisaun Timor-Leste kona-ba situasaun mundiál, liuliu konflitu, funu no nesesidade atu hametin pás no diálogu entre nasaun sira.
Primeiru Ministru Xanana Gusmão, informa katak Prezidente Repúblika sei halo vizita ba Nova Iorke, Estadus Unidus, atu partisipa iha atividade Nasaun Unidas (ONU) no reprezenta Timor-Leste iha fórum internasionál ne’e. Tanba povu Timor-Leste hotu presiza akompaña diskursu Prezidente Repúblika iha Parlamentu, tanba iha diskursu ne’e Xefe Estadu hatudu ona vizaun no hanoin kona-ba situasaun nasaun nian.
Prezidente Repúblika sei ba Nova Iorke ho misaun atu reprezenta Timor-Leste no ko’alia kona-ba situasaun mundiál ne’ebé agora enfrenta dezafiu boot, liuliu konflitu no funu iha parte oioin. Tanba ne’e husu atu povu akompaña diskursu Prezidente Repúblika, tanba nia sei lori mós mensajen kona-ba situasaun no vizaun Timor-Leste nian.
“Tuir ha’u nia hanoin, Prezidente Repúblika bainhira ba ne’e sei fó hatene mós saida mak ita hala’o hela iha ita nia rai. Ita tuku malu, oho malu ka tiru malu, no demokrásia oinsa ita respeita malu ka lae,” dehan Primeiru Ministru Kay Rala Xanana Gusmão ba jornalista sira iha Palásiu Prezidensiál Bairu-Pite, Kinta 17/09.
Nia hatutan, Timor-Leste iha hanoin rasik kona-ba situasaun mundiál agora, no Prezidente Repúblika sei lori hanoin hirak ne’e ba ONU atu hato’o pozisaun Timor-Leste kona-ba dezafiu sira ne’ebé mundu enfrenta.
“Tanba iha ONU ne’e la’ós atu gaba an ka hatudu de’it saida mak ita iha. Agora ita haree funu, no Prezidente Repúblika sei husu katak tenke iha pás, tenke iha diálogu no tenke iha solusaun dame,” Xanana dehan.
Xanana mós liga situasaun funu iha mundu ho aumentu presu petróleu iha merkadu internasionál. Tuir nia, konflitu no funu sira bele sai ida hosi faktór sira ne’ebé afeta presu mina no halo presu sa’e beibeik.
Alem ne’e, Xanana informa Prezidente Repúblika katak iha fulan Outubru nia sei viaja ba Tailândia atu partisipa iha workshop kona-ba Fundu Petróleu, no sei halo mós vizita ofisiál ba nasaun ne’e.
Jornalista: David da Costa
