Dili, Timor-Leste, 17 Setembru 2026 (I-klik.info) — Feto emprezária sira no líder emprezariál sira selebra ohin kalan tanba manan-na’in sira husi Prémiu Emprendedor Feto Timor-Leste 2026 nian anunsia ona. Agora iha tinan datoluk, Prémiu ne’e fó onra ba feto sira ne’ebé nia negósiu no lideransa fo valór ekonómiku no sosiál iha kreximentu nasaun nian.
Prémiu ida ne’e organiza husi International Finance Corporation (IFC), membru ida husi Grupu Banku Mundiál ne’ebé foka ba setór privadu, no Associação Empresarial das Mulheres de Timor-Leste (AEMTL). Prémiu refere hola parte iha Programa Abilidade Setór Finanseiru Timor-Leste, inisiativa konjunta husi IFC no Banco Central de Timor-Leste (BCTL), ne’ebé ho objetivu atu promove inkluzaun finanseira liu husi inisiativa abilidade alvu sira.
Inisiativa rua ne’e hetan apoiu husi governu Austrália no Nova Zelándia. Ho patrosíniu husi Sua Exelénsia Prezidente José Ramos-Horta, Prezidente Repúblika Timor-Leste, serimónia ne’e fó onra ba vensedór na’in sanulu husi setór diferente hanesan iha retallu, agrikultura, ospitalidade no finansas. “Forsa no reziliénsia husi feto Timoroan sira sai sentrál ba ita-nia nasaun nia jornada, husi luta ba independénsia to’o serbisu ne’ebé la’o hela atu hari’i futuru ida ne’ebé forte liu tán.
Tema ba tinan ida-ne’e, ‘Feto sira bele lidera iha área hotu-hotu,’ hanesan lembransa ida katak fó kbi’it ba feto sira atu partisipa no lidera iha setór hotu-hotu ne’e esensiál ba ita-nia progresu nasaun nian. Bainhira fó oportunidade hanesan ba feto sira. atu lidera, sira lori inovasaun, determinasaun, no perspetiva sira ne’ebé hametin ita-nia komunidade no instituisaun sira, ha’u bolu ita hotu atu kontinua apoia feto sira-nia lideransa no partisipasaun iha ekonomia atu nune’e hamutuk ita bele hari’i Timor-Leste ida ne’ebé inkluzivu, dignu, seguru, no prósperu ba ema hotu-hotu,” hateten husi J. Ramos-Horta, Prezidente Repúblika TimorLeste no Nobel Peace Laureate.
“Envolvimentu feto iha setor xave sira promove sosiedade Timorense ida ne’ebe digna, seguru no prospera” hateten husi Kay Rala Xanana Gusmão, Primeiru Ministru, Timor-Leste. “Ita presiza tau hamutuk esforsu hodi melhora liu tan prestasaun serbisu social no promove partisipasaun, asesibilidade no envolvimentu feto iha setor xave hodi promove sosiedade timorense ida ne’ebe digna, seguru no prospera, liliu ba feto.”
Empreza mikro, ki’ik, no médiu ne’ebé lidera husi feto sira mak sai fonte importante ba empregu no subsisténsia komunidade nian iha Timor-Leste. “Feto mak forsa ekonómika invizível ne’ebé sustenta no hametin nasaun ida”, hateten husi Hergui Luina Fernandes Alves, Prezidente AEMTL. “Fó kbi’it, rekoñese, no investe iha feto sira la’ós de’it opsaun ida – ida-ne’e mak asaun esensiál ida atu hari’i ekonomia ne’ebé forte no prósperu liu.”
Prémiu 2026 nian iha vensedór na’in sanulu husi prémiu sia. Avaliasaun sira bazeia ba lideransa ne’ebé hatudu, inovasaun, impaktu ne’ebé halo, kreximentu negósiu, inkluzaun finanseira, mentorizasaun, sustentabilidade, no kontribuisaun sira ba empoderamentu ekonómiku feto Timor-Leste nian.
“Prémiu tinan ida ne’e nian hatudu talentu no espíritu emprezariál feto sira nian iha Timor-Leste,” hateten husi David Freedman, Reprezentante Rezidente Grupu Banku Mundiál nian ba Timor-Leste.
“Ami hato’o parabéns ba partisipante sira, ba sira-nia realizasaun inspiradora no kontribuisaun ba Timor-Leste nia dezenvolvimentu. Sira-nia reziliénsia, inovasaun, no lideransa mak ajuda kria empregu, hametin komunidade sira, no inspira jerasaun emprezáriu sira tuir mai.”
Kategoria Prémiu ba premiu mak Inisitiva Ba Empoderamentu Ekonómiku, Negósiu Lidera Husi Feto, Lider feto no Feto iha servisu finanseiru
