Díli, 4 Setembru 2026 (Iklik.Info) – Polísia Nasionál Timor-Leste (PNTL), liu husi Diresaun Servisu Investigasaun Kriminál (DSIK) no Diresaun Servisu Informasaun Polísia (DSIP), ho Servisu Imigrasaun (SI), halo operasaun iha Otél Diamond Villa, Pantai Kelapa, Díli, no konsege desmantela atividade rede scam call center ida, ne’ebé suspeita envolve sidadaun estranjeiru husi Xina.
Iha operasaun ne’e, autoridade seguransa sira detein sidadaun estranjeiru Xina na’in-neen ne’ebé envolve iha atividade ilísitu scam call centre no tuir informasaun sidadaun na’in-neen, la iha pasaporte iha sira nia liman.
Maibé, iha prosesu operasaun ne’e, deskonfia iha alegasaun kona-ba autór judisáriu Balun ne’ebé servisu iha Tribunál telfone autoridade seguransa atu labele kontinua halo buska tan, ho razaun katak operasaun ne’e liu ona oras. Maski nune’e, autoridade seguransa kontinua halo buska iha Otél Diamond Villa, Pantai Kelapa, no detein sidadaun estranjeiru Xina na’in-neen.
Vice-Diretór Asosiasaun HAK, Antonino de Limas, konsidera katak se duni iha autoridade ruma ne’ebé impede autoridade seguransa hodi hala’o buska ba kazu grave hanesan rede scam call center, situasaun ne’e bele konsidera hanesan indikasaun ba abuzu podér.
“Ne’e atu dehan kazu sira hanesan ne’e relasiona ho abuzu podér. Loloos parte seguransa halo sira nia servisu, instituisaun seluk labele impede,” dehan Antonino de Limas ba Iklik.Info iha kantna Asosiasaun Hak, Sexta 4/09.
Nia hateten katak instituisaun estadu tenke fó apoiu ba autoridade seguransa atu hala’o buska no investiga kazu sira ne’ebé konsidera todan, liuliu tanba kazu sira hanesan rede scam call center bele estraga imagem nasaun nian no fó impaktu ba moris ema barak.
“Loloos instituisaun estadu halo sira nia kna’ar atu halo buska ba kazu sira ne’ebé todan no estraga imagem nasaun nian, no nia impaktu ba ema barak nia moris. Entaun, loloos ne’e labele iha impedimentu hanesan ne’e,” nia afirma.
Antonino mós subliña, se duni iha evidénsia katak autoridade ruma tenta impede servisu autoridade seguransa ne’ebé hala’o tuir lei, autoridade kompetente tenke investiga no prosesa parte sira ne’ebé responsavel tuir prosedimentu no lei ne’ebé vigora.
“Se tuir duni hanesan ne’e, atu dehan ida abuzu podér, no buka tuir prosesa autor sira ne’ebé halo impedimentu ba servisu seguransa ida ne’ebé tuir lei hateten,” nia hateten.
Nia mós fó apresiasaun ba PNTL tanba kontinua hala’o nia kna’ar iha operasaun ne’e no konsidera katak autoridade seguransa tenke kontinua servisu bazeia ba lei.
“Se buska ne’e PNTL kontinua la’o, hau apresia sira nia servisu no fó parabéns tanba sira halo nia kna’ar ho di’ak bazeia ba lei,” Antonino de Limas hateten.
Iha parte seluk, nia husu ba autoridade kompetente atu halo verifikasaun no prosesa tuir lei, se iha duni indikasaun kona-ba impedimentu ba autoridade seguransa durante hala’o investigasaun no operasaun kontra atividade kriminál.
“Agora ba autoridade ida ohin ne’e, se ida duni indikasaun ba impedimentu, ita husu atu prosesa tuir lei, tanba loloos labele akontese hanesan ne’e,” nia konklui.
Jornalista: David da Costa
