Dili, 4 de Setembro 2026 (I-Klik.info)- Labarik idade minoridade husi Rejiaun Administrativu Espesial Oecusse Ambeno (RAEOA) ne’ebe inan aman sira haruka mai hodi eskola iha Dili maibe tuir fali maun ho tiun sira hodi halo servisu todan hanesan dudu gerobak no faan sasan maka Autoridade RAEOA enkontru ona ho inan aman ne’ebe kontinua abandona oan atu hapara subsidiu bolsa da mae tanba inan aman sira husi labarik sira nee balun simu hela subsidiu bolsa da mae, nune’e PA RAEOA halo ona kooperasun ho parte relevante sira hanesan INDICA PDHJ nune’e labarik balun fila ona ba Oecusse no reduz ona numeiru labarik neebe halo servisu todan iha sidade Dili.
PA RAEOA Regio Salu dehan, uluk pior liu labarik sira mai husi Oecuse inan aman sira la preokupa no balun inan aman simu bolsa da mae, nune’e PA RAEOA asina ona MOU ho INDICA atu haree asuntu nee, no dadaun ne’e sira halo mos kooperasun ho APORTIL no halo mos vijilansia iha area ne’ebe ema uza labarik sira hodi halo servisu forsada inklui dudu gerobak ne’ebe momentu ne’e dadus hatudu Oecusse mak maioria maibe tanba intervensaun husi INDICA ho PDHJ iha terenu nune’e redun on numeiru labarik Oecusse oan ne’ebe halo servisu todan.
“Sira nia maun ho tiun ne’ebe labarik sira nia inan aman haruka mai atu eskola maibe haruka halo fali servisu no ekipa task force lalin sira ba hotu polisia hodi presta deklarasaun nune’e labarik barak fila hotu Oecusse” dehan PA RAEOA Regio Salu iha salaun MSSI Kaikoli, (4/9).
Nia dehan tan, dadaun ne’e sira servisu hamutuk ho INDICA produz baner ho lian Baikenu atu labele akontese tan labarik Oecusse oan ne’ebe kontinua faan sasan, nune’e nia ko’alia ona inan aman ne’ebe simu bolsa da mae maibé oan kontinua lori ba Dili hodi faan sasan nia sei kansella subsidiu bolsa da mae nunee mos nia informa ona ba xefe suku sira atu haree oan sira ne’ebe inan aman kontinua abandona oan sira liuliu kontinua haruka oan sira ba Dili tuir maun ho tiun hodi halo servisu todan sira sei hapara bolsa da mae.
“Prezidenti Autoridade hau tun ba enkontru ho komunidade hau aviza katak inan aman ne’ebe simu bolsa da mae maibé permiti oan ba Dili hau kansela iha lista, servisu ho INSS no Xefe suku sira mos ita informa tiha ona simu bolsa da mae maibe nia oan sergam la diak ka nia oan nia papelaria nee laiha sa tan abandona oan ba Dili tuir nia tiun sira maun sira serbisu iha Dili nee ita hapara” dehan PA RAEOA Regio Salu.
Regio Salu informa tan, uluk numeiru labarik Oecusse oan ne’ebe faan sasan iha dalan liu 300 maibe dadaun nee husi kooperasun ne’ebe sira halo ho perte relevante sira iha oan redusaun ba numeiru sira ne’ebe antes rejista ba labarik sira.
Jornalista: Silvino Freitas
