Díli, 19 Agostu 2026, (Iklik.Info)- Republika Demokratika Timor-Leste (RDTL) ho Repúblika Populár Xina (RPX) formaliza akordu kooperasaun iha área defeza, hodi fó prioridade bá kapasitasaun rekursu umanu, lojístika, edukasaun militár no dezenvolvimentu infraestrutura saúde militár.
Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Calisto dos Santos Coli “Coliati”, hateten, enkontru bilaterál ne’e foka liu bá asuntu defeza no seguransa, inklui kooperasaun ne’ebé estabelese ona no oportunidade atu hasa’e tán kooperasaun iha futuru.
“Enkontru ne’e toka liu asuntu defeza no seguransa liuhosi akordu kooperasaun sira ne’ebé hala’o tiha ona no presiza tan atu hala’o. Governu Xina komprometidu atu fó apoiu nafatin bá F-FDTL,” dehan, Majór Jenerál Calisto dos Santos Coli “Coliati”, iha Ministériu Defeza, Fatuhada, Díli, kuarta 19/08.
Nia haktuir, enkontru ne’e hala’o entre Ministru Defeza Nasionál Xina no Ministru Defeza Timor-Leste. Tanba Ministru Defeza Timor-Leste daudaun hala’o tratamentu saúde, Primeiru Ministru Kay Rala Xanana Gusmão assume nu’udár Ministru Defeza Interinu hodi reprezenta Timor-Leste iha enkontru ho nia omólogu hosi Xina.
Durante períodu kooperasaun ne’e, Governu Xina kontinua fó apoiu bá dezenvolvimentu Akademia Militár, saúde militár no lojístika F-FDTL. Atualmente, membru F-FDTL balun hetan formasaun iha Xina, liuliu iha área lojístika no formasaun ba ofisiál júniór.
Kooperasaun foun ne’e sei reforsa área lojístika no edukasaun militár, enkuantu Governu Xina mós planeia apoiu bá harii ospitál militár iha Timor-Leste iha tinan sira oin mai.
Entertantu Akordu kooperasaun ne’e asina hosi Diretór Jerál Rekursu Defeza, Martinho Soares Moniz, no Xefe Adjuntu Gabinete ba Kooperasaun Militár Internasionál, Komisaun Militár Sentrál Xina, ZHANG Jiyu.
Asinatura akordu ne’e sasin direta hosi Primeiru-Ministru (PM) no Ministru Defeza Interinu, Kay Rala Xanana Gusmão. Nune’e mos Asinatura akordu ne’e hala’o hafoin enkontru bilaterál entre Ministru Defeza Interinu Timor-Leste, Kay Rala Xanana Gusmão, ho Ministru Defeza Nasionál Xina, Dong Jun.
Jornalista: David da Costa
