Loron 20 Fulan Agustu, hanesan loron Nasional Falentil, ne’ebe transforma ona ba Falintil-Forsa Defeza Timor-Leste (F-FDTL), tanba ne’e, Timor-Leste selebra loron Nasional refere, ba dala 51 ho nunee I-iklik hala’o entrevista ho Joventude sira hodi husu sira nia hanoin , esperansa no Rekomendasaun ba loron importante refere.
Tuir Cesaltino de Jesus hato’o ninia parabens ba loron Falintil nian, ne’ebe selebra ba dala 51 nunee , foin-sae refere hato’o ninia rekomendassaun ba servisu F-FDTL sira nian atu mantein servisu ho Profisionalismu no garante segurasan ne’ebe kualidade hodi evita mafia sira atu tama iha TL.
“Ha’u hakarak, atu rekomeda ba F-FDTL sira katak nafatin hatudu servisu transparante, profisional, atu Servi povu ida ne’e, atu mafia ne’ebe atake ita nia nasaun no asuntu sira ne’ebe ita lakoi atu akontese iha ita nia nasaun bele menus, atu nasaun bele livre husi mafia sira”, dehan Cesaltino iba I-iklik ha kampus kaikoli, Kinta/20/08
Nia haktuir , Loron ohin hanesan loron importante ida ne’ebe TL selebra, hanesan jersaun foun sente orgullu ba loron Falintil ne’e tanba laos deit loron atu selebra ne’e, maibe loron ida ne’e atu hanoin hikas fali sakrifisiu ne’ebe veteranu sira luta ba restaursaun Independinsia ba nian.
Jerasaun foun ne’e sente orguillu, ba kontribusaun husi veteranu no martires sira ne’ebe durante ne’e esforsu ona sira nia an ba luta libertasaun nasional ohin ohin loron ita bele hetan Independinsia hodi harii estadu ida ne’ebe demokratika.
“Hau nia observasaun ba Falintil iha tempu uluk ne’ebe ohin loron tansforma ba F.FDTL, Nia papel agora iha ne’e atu asegura no fo manutensaun ba defeza nasaun nian, hanesan jersaun foun apresia servisu ka dediksaun husi F.FDTL nian, ne’ebe servisu diak tebes tanba servisu atu proteje ita nia soberania TL nian”, Nia observa
Nia husu, hakarak konvida jerasaun foun hotu-hotu atu aprende kona-ba istoria no valoriza istoria sira atu bele kuda nafatin Unidade , Paz no instabilidade iha Ita ida-idak nia fuan, hodi banati tuir nafatin espiritu luta nain sira nian.
“Ha’u Nia mensajen mak hakarak hato’o parabens ba membru Falentil sira ne’ebe uluk luta hodi hetan Vitoria ida ne’e no hakarak hato’o mos parabens ba F-FDTL sira ne’ebe kontinua servisu hodi sai luta ba ita nia nasaun ida ne’e”, Nia hato’o mensajen
Iha fatin seluk, Moizes Saldana haktuir 20 de Agostu hanesan loron importante ba Timor-Leste hodi selebra loron Falintil ba dala 51 ho nunee husu ba sidadaun hotu atu fo minutu balun hodi fo reflesaun atu hanoin hikas heroin sira ne’ebe luta ona ba libartasaun Timor-Leste nian.
“Ohin loron Marka loron ne’ebe importante hodi Ita selebra loron Falentil ba Dala 51, entaun loron ida ne’e nu’udar reflesaun ba ita juventude sira atu hanoin hikas fali ita nia Inan, aman KA veteranus ne’ebe durante ne’e sakrifika sira nia an ba rai ida ne’e, ho objetivu ida katak atu lori TL ba ukun rasik an”, dehan Moizes
Hanesan joven nafatin banati tuir buat ne’ebe Aman veteranu sira ka heroi sira halo atu bele guia nafatin ita nu’udar dalan ida atu hamutuk hateke ba oin hodi lori dezemvolvimentu ba ita nia nasaun, tanba joventude mak heroi ba dezemvolvimentu, no Inan-Aman uluk ne’e hanesan heroi ba Patria.
Nia haktuir , Hanesan jersaun foun hakarak tempu ida ohin loron diak liu ita gasta tempu hodi buka esperiensia hodi valor ba ita nia moris hodi guarante futuru nasaun nian, no ita bele hadook an husi problema buat ne’ebe Ita sente negativu ba Ita.
“Ha’u nia observasaun ba servisu F-FDTL nian , durante ne’e sira servisu diak tebes tuir maturidade politika ne’ebe sira hala’o no husu nafatin atu mantein ho servisu ne’e hodi garante segurasan ne’ebe kualidade ba ita nia nasaun RDTL ida ne’e” Nia observa
Mensajen ba parte kompete hanesan veteranus ne’ebe uluk sira sakrifika sira nia an ba rai ida ne’e atu iha saude diak nafatin no hatudu nafatin exemplu diak ba jersaun foun sira atu ami bele banati tuir antes sira laiha.
Aleinde ne’e, Joventude feto Livania da Costa haktuir katak, esperansa ba futuru katak F-FDTL sira bele hala’o nafatin sira nia knar tuir mandatu ne’ebe sira hetan, atu bele mantein responsabiliza, no fo seguansa ne’ebe kualidade ba ita nia nasaun hodi garante paz no instabilidade iha ita nia nasaun.
“Hau sente orgullu ba loron ohin nian, tanba ohin loron ita atu hanoin hikas fali sakrifisiu ne’ebe durante ne’e heroi sira halo no ha’u nia agradese i obrigadu mos ba F-FDTL nia servisu , tanba tuir ha’u nia observasaun jeral F-FDTL sira servisu diak tebes Laos hanesan servisu PNTL nain ne’ebe halakon fali sidadaun kbiit laek sira nia vida ho armas nasaun nian”, dehan Livania da Costa
Jornalista: Filomena da Conceicao
