Dili, 27 de Agostu 2026 (I-Klik.info)-Liuhusi konferénsia imprensa iha komandu jeral PNTL Kaikoli, portavoz Polísia Nasionál Timor Leste (PNTL) Suprentidente Xefe João Belo dos Reis relata, operasaun fragrante delito ne’ebé halo, hodi monitoriza atividade balun ne’ebé suspeita ba krime tranznasional no organizadu, ho asosiasaun ba kriminal nian nune’e polísia nasionál halo intervensaun iha hotel California lokaliza iha area Metiaut nian, iha oras lokal 11:00 kalan kaptura tan sidadaun estranjeiru nain 16 feto ida no mane nain 15 ne’ebe aumenta tan nasaun foun ida ne’ebe involve iha kazu refere.
Sira nia orijen mak hanesan tuir mai, Sidadaun China: nain 7 (hitu), Sidadaun Myanmar: nain 7 (hitu), Sidadaun Vietnam: nain 1 (ida), Sidadaun Suriname: nain 1 (ida), ita bele hateten sidadaun estranjeiru ne’ebe involve iha kazu scamming iha ita nia rain aumenta tan nasaun ida orkalan ita detekta sidadaun Suriname mos involve iha laran” dehan portavoz PNTL Suprentidente Xefi João Belo liuhusi konferensia imprensa iha Komando Jerál Kaikoli, (27/08).
João Belo informa tan katak, Depois halo kapturasaun, ekipa konjuntu transporta kedas suspeitu sira mai iha DSIC hodi halo prosesu identifikasaun kompletu, depois de identifikasaun, suspeitu sira asegura kedas iha Sela Detensaun Komando Policia, Munsipio Dili, hodi garante sira nia detensaun no seguransa durante prosesu investigasaun.
“Kazu nee DSIC rejista ona ho Numeru Uniku de Caso (NUC) 0324/26-PNSIC Prosesu investigasaun nee sei kontinua no dokumentu sira nebe mak relasiona ho kazu nee sei submete ba Ministério Públicu (MP) hodi halo avaliasaun no prosedimentu judicial tuir lei nebe mak aplika” João Belo informa.
Portavoz nee relata tan katak, sidadaun sira ne’ebe involve iha kazu refere parte polísia halo ona cro check ba dadus sira ne’ebe rejista maibe sira ne’e foun laos sidadaun sira ne’ebe antes ne’e involve ona, nunee parte polísia kontinua halo operasaun sira nebe mak necessariu atu kombate atividade kriminal, inklui krime sira nebe mak relasiona ho teknolojia no telekomunikasaun nune’e apela ba komunidade atu kontinua koopera no reporta ba autoridade se ita-boot sira hetan informasaun kona-ba atividade suspeitu iha ita-boot nia area.
Jornalista: Silvino Freitas
