Dili, 27 Agostu 2026 (I-Klik.info)-Liuhusi konferénsia imprensa iha komandu jeral Polisia Nasional Timor-Leste (PNTL) Kaikoli portavoz PNTL Suprentidente Xefi João Belo informa, polisia nasional kontinua halo nia servisu koordena nafatin ho autoridade servisu migrasaun UPF UPM hodi halo kontrollu ba sidadaun estranjeiru ne’ebe hasees an husi fatin scam call centre hodi halo atividade servisu balun iha bairu ruma Servisu Investigasaun Kriminál sei buka tuir nafain hodi aprezenta fali ba tribunál tuir responsabilidade ne’ebe sidadaun sira simu ona.
“Fatin balun sira kumpri maibe kuandu la kumpri emediatamente komadante eskuadra fatin ne’ebe sira relata ne’e informa lalais ba polisia ho tribunál hodi tribunál bele hasai lalais fali orden foun ba ami” informa Suprentidente Xefi João Belo.
Nia informa tan, medida balun aplika tuir mandadu husi tribunal nian ba suspeitu balun iha Ulmera no nain 13 asegura ona hodi lori ona ba prizaun no restu sei buka tuir hela, tanba sidadaun estranjeiru hirak ne’e la kumpri sansaun administrativu ne’ebe aplika husi tribunal ba kazu ne’ebe sira involve.
Nune’e portavoz nee mos informa katak informasaun neebé espalla iha media sosial katak sidadaun balun neebe halai sai ona husi teritoriu nasional ne’e laloos tanba seida’uk iha informasaun sufisiente katak sidadaun estranjeiru sira ne’ebe halai lakon sai ona husi teritoriu nasional tanba parte polísia simu ona informasaun katak sidadaun hirak ne’e dadaun ne’e balun servisu hela iha projeitu no balun servisu iha loja nune’e polísia kontinua buka tuir sira hodi aprezenta ba tribunál hodi kumpri sansaun administrativu.
“Informasaun ita bele hatete seida’uk loos tanba ita seida’uk iha informasaun ida katak sidadaun nee too ona nasaun ida nasaun ida neeba, ita buka tuir hela sira” informa portavoz.
Portavoz ne’e konklui, sidadaun estranjeiru ne’e hamutuk 60 resin ne’ebe dezvia ona husi fatin konsentrasaun ne’ebe sira aluga nune’e parte polísia nasionál sei buka tuir nafatin liuhusi koordenasaun polisia nian ho seguransa fronteira no servisu migrasaun ho mos autoridade komunitaria buka tuir nafatin sidadaun hirak ne’e hodi bele respobiliza aktu ne’ebe sira halo iha perante tribunál.
Jornalista: Silvino Freitas
