Díli, 1 Setembru 2026 (Iklik.Info) – Prezidente Repúblika Timor-Leste no Laureadu Nobel ba Pás, José Ramos-Horta, hato’o sentidu kondolénsia kle’an ba Prezidente, Governu no povu Nepal, hafoin rai-monu no inundasaun sira ne’ebé foin lalais ne’e akontese iha parte oioin iha nasaun Nepal.
Iha karta ofisiál ida ho data 31 Agostu 2026, ne’ebé dirije ba Prezidente Nepal Ramchandra Paudel, Prezidente Ramos-Horta espresa nia tristeza kle’an kona-ba trájiku ne’ebé hamosu lakon vida, númeru aas husi ema sira ne’ebé lakon, no destruisaun jeneralizada ba komunidade, uma no infraestrutura krítiku sira.
Prezidente Ramos-Horta hateten Timor-Leste simu ho laran susar tebes notísia kona-ba lakon vida no estragu sira ne’ebé akontese tanba dezastre naturais iha nasaun Nepal.
“Ha’u hakarak hato’o ha’u nia sentidu kondolénsia kle’an ba Sua Exelénsia, Governu no Povu Nepal nian, liu-liu ba família vítima sira ne’ebé afetadu husi rai-monu no inundasaun sira ne’ebé foin lalais ne’e akontese iha fatin oioin iha nasaun Nepal,” dehan Prezidente Ramos-Horta iha komunikadu ofisiál ne’ebé Iklik.Info asesu husi Palásiu Prezidensiál Bairu-Pite, Tersa 1/09.
Ramos-Horta kontinua dehan “Ami simu ho laran-susar tebes notísia kona-ba lakon vida, númeru aas husi ema sira ne’ebé lakon, no estragu sira ba komunidade, uma, estrada no infraestrutura sira seluk”.
Prezidente Ramos-Horta mós hato’o solidariedade no kompaixaun ba família sira ne’ebé lakon ema sira ne’ebé sira hadomi, no fó forsa no esperansa ba komunidade sira ne’ebé afetadu husi dezastre ne’e.
“Iha tempu sofrimentu no susar boot ida-ne’e, ha’u hakarak hato’o ba família sira ne’ebé lakon ema sira ne’ebé sira hadomi, ami nia solidariedade no kompaixaun sinseru, no mós ami nia dezeju ba forsa no esperansa ba komunidade sira ne’ebé afetadu no ba ekipa sira ne’ebé kontinua hala’o operasaun hodi buka, salva no ajuda,” dehan Ramos-Horta.
Timor-Leste espresa nia solidariedade tomak ho povu Nepal iha tempu susar ida-ne’e. Governu Timor-Leste mós hein katak esforsu emerjénsia no rekuperasaun ne’ebé hala’o daudaun sei ajuda salva vida, fó asisténsia ba sobrevivente sira no harii fila fali komunidade sira ne’ebé afetadu husi rai-monu no inundasaun.
Jornalista: David da Costa
