Díli, 2 Setembru 2026 (Iklik.Info) – Polísia Nasionál Timor-Leste (PNTL), liu husi Diresaun Servisu Investigasaun Kriminál (DSIK) hamutuk ho Diresaun Servisu Informasaun Polísia (DSIP), halo operasaun no konsege desmantela tan atividade rede scam call center ida iha área Kolmera, Díli, no detein sidadaun estranjeiru husi Xina na’in-neen, ne’ebé suspeitu hala’o atividade ilísita liuhusi scam call centre.
Tuir observasaun Iklik.Info iha terenu, operasaun ne’e akontese iha kuaze tuku 19:00 kalan, bainhira autoridade seguransa tama ba rezidénsia ida iha Kolmera no detein sidadaun estranjeiru husi Xina na’in-neen, ne’ebé suspeitu envolve iha atividade ilísitu scam call centre.
Rezidénsia ne’ebé sidadaun estranjeiru sira utiliza ne’e iha andar rua. Parte kraik utiliza ba atividade negósiu fa’an karreta, enkuantu parte leten iha kuartu haat. Husi kuartu haat ne’e, kuartu rua suspeitu utiliza ba hala’o atividade ilísitu scam call centre.
Durante autoridade seguransa hala’o busca no apreensaun, ekipa identifika ekipamentu no sasán sira ne’ebé suspeitu uza ba atividade ne’e, inklui aparellu Starlink ida, router ida, meza boot haat, kadeira hamutuk sia armáriu rua no kipas rua.
Aleinde ekipamentu hirak-ne’e, autoridade seguransa mós apreensaun ba evidénsia seluk, inklui laptop ne’en, komputador haat, telefone sira ne’ebé seidauk determina númeru exatu, karreta ida no sasán seluk ne’ebé iha relasaun ho atividade ilísitu scam call centre.
Hafoin buska no apreensaun remata, autoridade seguransa lori kedas sidadaun estranjeiru Xina na’in-neen, hamutuk ho evidénsia sira ne’ebé hala’o apreensaun ba edifísiu DSIK, Komandu Jerál PNTL, iha Kaioli, Díli, atu kontinua prosesu investigasaun.
Entretantu, Iklik.Info mós hetan informasaun iha terenu katak, husi sidadaun estranjeiru na’in-neen ne’ebé detein iha operasaun ne’e, sidadaun estranjeiru na’in-rua ho inisiál LM no YY antes ne’e autoridade seguransa kaer ona iha fatin hanesan tanba suspeita hala’o atividade scam call centre.
Maibé, tuir informasaun ne’ebé maka iha, sidadaun estranjeiru na’in-rua ho inisiál LM no YY ne’e lori uluk ona ba Tribunál no hetan medida Termu Identidade no Rezidénsia (TIR). Depois, sira rua ne’e supostamente kontinua hala’o atividade hanesan iha fatin ne’ebá.
Kazu ne’e sei kontinua iha prosesu investigasaun autoridade kompetente atu determina natureza atividade no responsabilidade legal husi ema sira ne’ebé envolve.
No operasaun ne’e halo nu’udar parte husi esforsu autoridade seguransa atu prevene, deteta no investiga atividade ilísita ne’ebé suspeitu hala’o iha territóriu Timor-Leste
Jornalista: David da Costa
