Dili, 16 de Outubru 2026(I-KLIK.INFO)-Matadalan Institutu (MDI) lansa planu estratéjika ba tinan 2026-2030 nuudar jornada foun iha organizasaun nia laran atu haree ba destinu organizasaun nian iha tinan lima nia laran, nunee MDI bele sai parseiru ba governu hodi kontribui ba dezenvolvimentu nasaun nian liuhusi iha aspeitu kritiku ba transparansia no akuntabilidade politika publika governu nain no akompaña prosesu desentralizasaun lokal ne’ebe akontese iha tinan oin.
Diretor Ezekutivu MDI Estevanus Coli dehan, lansamentu ba planu estratéjika ne’e hanesan jornada foun husi Matadalan Institute nian neebe hamriik husi prosesu tomak iha tinan 21 nia laran nune’e sai prosesu foun hodi ajusta ba tinan lima oin mai iha 2026-2030 no planu refere atu dezena distinu moris organizasaun nian ne’ebe foku ba pilar tolu importante maka haforsa dezenvolvimentu instituisaun iha MDI nia laran ho pensamentu kritiku nune’e bele uza plataforma ida iha integrasaun iha rejional ASEAN nian.
“Ami mos nafatin kolabora no fo apoiu ba komunidade no fo asistensia ba sira oinsa mak sidadaun sira bele hola parte nuudar sidadaun ativu iha dezenvolvimentu nia laran” dehan Diretor Ezekutivu MDI iha Tower Fatuhada, (15/10).
Nia dehan tan, husi prosesu nee mos atu apoia ba governu tanba MDI mos parseiru governu nian hodi fo kontribuisaun ba dezenvolvimentu liuhusi aspeitu kritiku sira liuhusi fornese dadus no informasaun kredivel ba governu no entidade estadu sira hodi bele uza ba referensia ba foti dezisaun nian, durante ezistensia iha tinan 20 nia laran sira halo ona prosesu barak tulun komunidade sira oinsá iha rejilensia ba moris liuhosi jestaun utilizasaun rai hametin sira nia ekonomia lokal, partisipa ativu iha dezenvolvimentu lokal nain ba utilizasaun sira ne’ebe mak governu prepara no sira iha mos iha kooperasaun diak ho governu liuliu ho ministeriu administrasaun estatal no Ministeriu sira seluk iha prosesu implementasaun PNDS nian.
“Ami hanesan parseiru ne’ebe diak loos ho sira no ami nia kooperasun nee iha prosesu ne’ebe intende malu difikuldade ne’ebe akontese iha terenu no oinsa mak bele relata ida nee ba instituisaun governu hodi toma desizaun no prosesu balun ne’ebe nia rezultadu diak loos hanesan uluk iha uma naroman ba povu ami iha kontribuisaun ne’ebe diak loos iha neeba” dehan Estevanus Coli.
Nai konklui, hafoin lansamentu ba planu estratéjika nee iha tinan lima nia laran sira sei aposta ba transparansia no akuntabilidade politika publika no sira mos sei akompaña nafatin prosesu desentralizasaun neebe sei akontese iha tinan oin no prosesu sira sistema dijitalizasaun iha governu tanba ida nee mak iha difikuldade iha mekanizmu boagovernasaun nian, nunee bainhira sira halo peskiza no kooperasaun ho entidade sira iha nivel rejional hodi apoia diak liu tan governu hodi bele harii sistema ida ne’ebe maka fo aksesibilidade ne’ebe diak liu ba nia sidadaun sira liuhusi plataforma dijital.
Jornalista: Silvino Freitas
