Baucau, 20 Agostu 2026, (Iklik.Info)- Prezidente Repúblika (PR), José Ramos-Horta hateten liberdade ne’ebé hetan hosi luta no sakrifísiu erói Rezisténsia tenke kontinua konsolida no transforma hosi jerasaun foun, liuhusi servisu públiku, respeitu ba lei, responsabilidade no kompromisu atu harii Timor-Leste ida ne’ebé dame, justu no prósperu.
Prezidente Ramos-Horta mós hateten katak maneira di’ak liu atu fó onra ba erói sira mak transforma sira nia sakrifísiu ba kompromisu ida ba prezente no futuru, liuhusi harii instituisaun sira ne’ebé forte, transparente no responsável.
“Maneira di’ak liu atu fó onra ba ita-nia eroi sira mak transforma sira-nia sakrifísiu ba kompromisu ida ba prezente no futuru, no ida-ne’e ezije instituisaun sira ne’ebé forte, transparente no responsável,” dehan Prezidente Repúblika Ramos-Horta, bainhira halo nia diskursu iha Aniversáriu FALINTIL nian ba dala-51, iha Abu Lir, Postu Administrativu Matebian, Munisípiu Baucau, Kinta, 20/08.
Ramos-Horta, haktuir, independénsia polítika tenke akompaña ho governasaun ne’ebé bazeia ba integridade, prestasaun kontas, kompeténsia no kompromisu atu tau rekursu nasionál sira ba servisu povu no jerasaun futuru nian.
Nia subliña katak governasaun di’ak no respeitu ba Estadu Direitu nu’udar forma konkretu ida hodi hatudu patriotizmu ba nasaun.
Tuir Ramos-Horta, patriotizmu erói Rezisténsia nian manifesta-an liuhusi sakrifísiu no luta ba liberdade. Enkuantu, patriotizmu ba jerasaun ohin loron tenke manifesta-an liuhusi servisu públiku, respeitu ba lei.
“Patriotizmu ita nia jerasaun nian tenke manifesta-an iha servisu públiku, respeitu ba lei sira, protesaun ba meiu ambiente, edukasaun ba ita nia oan sira no harii sosiedade ida ne’ebé justa no inkluziva liu,” Ramos-Horta Afirma.
Tanba ne’e, hadomi Timor-Leste signifika serbí povu, respeita instituisaun sira no garante katak labele iha sidadaun ida mak husik hela iha kotuk.
Nune mós, Ramos-Horta mós hateten liutiha dékada lima hafoin kriasaun FALINTIL, jornada Timor-Leste nian sei kontinua. tanba erói sira konkista tiha ona liberdade, maibé responsabilidade atu konsolida liberdade no transforma nia ba prosperidade ba ema hotu depende ba jerasaun ohin loron.
“Sira defende Pátria ho korajen. Ita-nia jerasaun tenke dezenvolve ho kompeténsia, responsabilidade no vizaun,” Ramos-Horta subliña.
Iha aniversáriu FALINTIL nian, Ramos-Horta apela ba sidadaun hotu atu hanoin hikas katak nasaun ida la’ós harii de’it iha momentu boot sira iha istória, maibé mos liuhusi eskolla loroloron ne’ebé sidadaun ida-idak halo.
Nia espera katak memória kombatente sira nian bele fó naroman ba dalan jerasaun foun sira, enkuantu aten-barani kombatente sira bele sai inspirasaun ba foin-sa’e sira atu kontinua kontribui ba dezenvolvimentu nasaun.
Ramos-Horta mos enfatiza katak unidade nasionál tenke kontinua sai forsa boot liu ba Timor-Leste, hodi harii nasaun ida ne’ebé nakonu ho dame, dignidade no esperansa.
Jornalsita: David da Costa
