Díli, 26 Agostu 2026 (Iklik.Info) –Governu Timor-Leste aprova projetu Dekretu Governu hodi estabelese Sentru Nasionál ba Koordenasaun, Avaliasaun no Kombate Ameasa Transnasionál (CN-CAT), nu’udar mekanizmu foun atu hametin koordenasaun entre instituisaun sira iha prevensaun no kombate fraude online, kriminalidade sibernétika organizada, tráfiku umanu no ameasa transnasionál sira seluk.
Iha Komunikadu ofisiál ne’ebé Iklik.Info sita katak, ohin sorumutu Konsellu Ministrus aprova projetu Dekretu Governu kona-ba Sentru Nasionál ba Koordenasaun, Avaliasaun no Kombate Ameasa Transnasionál (CN-CAT), nu’udar mekanizmu foun atu hametin koordenasaun inter-institusionál iha prevensaun no kombate ameasa transnasionál sira iha Timor-Leste.
“Aprovasaun ne’e alinha ho Planu Nasionál Integradu ba Prevensaun no Kombate Rede Transnasionál Fraude Finanseira Dijitál, Plataforma Burla Online (SCAM), Kriminalidade Sibernétika Organizada no Tráfiku Umanu, ba períodu 2026 to’o 2031,” dehan iha Komunikadu ne’ebé Iklik.Info asesu, Kuarta 26/06.
Iha Komunikadu ne’e, hateten, CN-CAT sei funsiona iha tutela direta Primeiru Ministru, ho misaun atu garante koordenasaun entre instituisaun sira, halo avaliasaun integradu kona-ba ameasa no fó apoiu ba prosesu foti desizaun estratéjiku Governu nian.
“Ameasa transnasionál sira ne’ebé tama iha área servisu CN-CAT inklui fraude finanseira dijitál, plataforma burla online, kriminalidade sibernétika organizada, entrada no estadia ilegál hosi sidadaun estranjeiru sira iha territóriu nasionál, no tráfiku umanu,” iha komunikadu ne’e subliña.
Sentru ne’e sei halibur reprezentantes hosi entidade prinsipál sira ne’ebé iha responsabilidade iha área hirak ne’e. Koordenasaun sei hala’o hosi Diretór-Jerál Servisu Nasionál Intelijénsia Estratéjika, ho apoiu hosi Diretór Polísia Sientífika Investigasaun Kriminál.
Entre funsaun prinsipál CN-CAT mak halo avaliasaun permanente kona-ba ameasa, elabora relatóriu no alerta estratéjiku ba Primeiru-Ministru, fahe informasaun entre entidade partisipante sira, no halo koordenasaun téknika no planeamentu ba asaun konjunta.
CN-CAT mós sei akompaña implementasaun medida sira ne’ebé prevee ona iha Planu Nasionál Integradu ba períodu 2026–2031, ho objetivu atu prevene no kombate ameasa ne’ebé bele afeta seguransa nasionál, soberania dijitál, estabilidade ekonómika, integridade sistema finanseiru nasionál no interese estratéjiku Estadu.
Maski nune’e, atividade CN-CAT la altera kompeténsia legal hosi entidade sira ne’ebé partisipa iha sentru ne’e. CN-CAT mós la iha podér atu halo investigasaun kriminál ka dirije operasaun sira.
Ministériu Públiku sei mantein ninia kompeténsia legal atu dirije investigasaun kriminál, enkuantu CN-CAT sei konsentra liu ba koordenasaun, avaliasaun, partilla informasaun no apoiu ba desizaun estratéjiku Governu nian.
Jornalista: David da Costa
