Díli, 26 Agostu 2026 (Iklik.Info)– ohin sorumutu Konsellu Ministrus delibera hodi ratifika aktu sira ne’ebé autoriza despeza no desizaun hodi loke prosedimentu aprovizionamentu, liuhosi konkursu públiku, ba akizisaun kombustivel ne’ebé destina ba Sentrál Elétrika Hera no Betanu.
“Desizaun ne’e tuir projetu ne’ebé aprezenta hosi Ministru Obras Públikas, Samuel Marçal. Valor másimu estimadu ba despeza ne’e hamutuk dolar amerikanu millaun 428,99, ne’ebé fahe ba lote rua,” dehan iha Komunikadu ofisiál ne’ebé Iklik.Info sita, Kuarta 26/08.
Iha Komunikadu ne’e subliña katak, lote dahuluk destina ba Sentrál Elétrika Hera, ho valor estimadu maizumenus dolar amerikanu millaun 316,31, hodi fornese kombustivel hamutuk maizumenus litru millaun 372,5.
Enkuantu lote daruak destina ba Sentrál Elétrika Betanu, ho valor estimadu maizumenus dolar amerikanu millaun 112,67, ba fornecimentu kombustivel hamutuk maizumenus litru millaun 129,9.
“Prosedimentu aprovizionamentu ne’e iha objetivu atu garante kontinuidade fornecimentu kombustivel hahú hosi fulan-Janeiru 2027. Ida-ne’e konsidera importante atu garante operasaun kontínua hosi sentrál elétriku rua no produsaun eletrisidade iha Timor-Leste, liuliu hafoin kontratu fornecimentu atuál sira termina iha fulan-Dezembru 2026,” hateten iha komunikadu ne’e.
Kontratu foun ne’e sei iha durasaun tinan tolu. Governu konsidera katak kontratu ho durasaun ne’e bele fó estabilidade boot liu ba fornesimentu kombustivel, fasilita jestaun ba rezerva kombustivel no permite Governu hetan folin fornesimentu ne’ebé liu vantajozu liu.
Ho aprovasaun prosedimentu konkursu públiku ne’e, Governu prepara mekanizmu foun hodi asegura katak nesesidade kombustivel ba Sentrál Elétrika Hera no Betanu bele kontinua responde ba nesesidade produsaun eletrisidade nasional hosi inísiu tinan 2027.
Jornalista: David da Costa
