Dili, 9 de Outubro de 2026 (I-KLIK.INFO)- Fundasaun Mahein (FM) manifesta preokupasaun sériu kona-ba fasilidade ne’ebé la adekuadu atu halo formasaun ha kandidatu Polisia Nasionál Timor-Leste (PNTL) tanba fasilidade ne’ebé provizoriamente, saneamentu ne’ebé la sufisiente no infraestrutura ne’ebé limitadu hamosu preokupasaun kona-ba saúde fizika, bem-estar psikolojiku no kapasidade kandidatu sira atu tuir formasaun ho efetivu.
Liuhusi konferénsia imprensa Diretór Executivu FM dehan, sira preokupa liu-liu ho kapasidade fasilidade formasaun ne’ebé eziste iha Centro de Formação da PNTL iha Komoro, tuir informasaun ne’ebé disponível, la adekuadu atu simu kandidatu na’in 500, enkuantu fasilidade formasaun iha Rai Robo reportedly bele simu de’it ema na’in 100, no fasilidade seluk bele iha kapasidade ne’ebé menus liu tan, nune’e numeru hirak-nee no kapasidade seguru real hosi kada fasilidade presiza verifika liuhosi avaliasaun ofisiál, nune’e halo formasaun ba kandidatu kadetes ne’ebé barak maibe laiha fasilidade ne’ebé di’ak sei prejudika ba ba professionalidade kadetes sira nian.
“Kondisaun hanesan ne’e bele aumenta risku moras, estrese, kole no falta higiene, kandidatu sira ne’ebé moras ka hetan difikuldade psikolojika bele hasoru problema atu konsentra, partisipa ho efetivu iha aula no dezenvolve koñesimentu no abilidade prátika neʼebé presiza atu hala’o knaar polisia” dehan Diretór Executivu FM Nelson Belo iha edifisiu FM Hudi-Laran, (9/10).
Nune’e FM enfaze katak kualidade membru polísia la depende de’it ba kurikulu formasaun no instrutór sira, maibé mós depende ba kondisaun no ambiente ne’ebé hala’o formasaun tanba formasaun durante fulan neen iha ambiente ne’ebé la saudavel ka la adekuadu bele prejudika aprendizajen, preparasaun fizika, reziliensia psikolojika no dezenvolvimentu profisionál kandidatu sira nune’e situasaun ne’e bele afeta kualidade servisu polísia ne’ebé presta ba públiku, nune’e FM Rekomenda Recrutamentu PNTL Anual atu labele barak maibé ho de’it kandidatu Na’in 250 bazeia ba avaliasaun kona-ba nesesidade polísia iha nasaun, orsamentu disponivel, kapasidade instutór sira no infraestrutura formasaan.
“Governu tenke ajusta númeru recrutamentu tuir kapasidade atu fornese formasaun ho kualidade, recrutamentu anual ho kandidatu na’in 250 sei permite Governu no PNTL atu planeia formasaun ho sistemátika, aloka rekursu ne’ebé sufisiente, hadi’a supervizaun no asegura katak kandidatu sira simu preparasaun fizika, akadémika, prátika no étika ne’ebé apropriadu” nia dehan.
Nune’e FM konsidera katak, politika recrutamentu ne’ebé sustentável bele ajuda Governu atu investe ho efetivu liu ba kada kandidatu, hametin padraun formasaun no hadi’a kualidade profisionál membru polisia foun, nune’e laos de’it atu aumenta númeru membru polisia, maibé atu produz membru polísia ne’ebé iha kompeténsia, disiplina, responsabilidade no orientasaun ba komunidade, hodi bele proteje populasaun no hala’o lei, nune’e FM rekomenda mos katak halo avaliasaun ba fasilidade formasaun ne’ebé eziste, implementa recrutamentu regular kada tinan planeia recrutamentu kandidatu na’in 250 kada tinan, ho ajustamentu tuir nesesidade polísia nasionál, disponibilidade orsamentu, kapasidade instrutór sira no númeru kandidatu ne’ebé fasilidade bele treina ho seguru no efetivu, prevene fasilidade atu la nakonu liu, asegura katak númeru kandidatu la liu kapasidade seguru ne’ebé determina ona, Hadi’a bem-estar kandidatu sira, Hari’i sentru formasaun PNTL permanente, Investe iha kualidade formasaun, Estabelese mekanizmu monitorizasaun ba rezultadu. Avalia saúde kandidatu sira, prezensa, rezultadu aprendizajen, taxa konkluzaun formasaun no prontidaun profisionál atu asegura katak investimentu públiku produz rezultadu ne’ebé efetivu.
Jornalista: Silvino Freitas
