DILI, 9 Outubru 2026 (I-KLIK.INFO) — Diretór Jerál Sekretariadu Estadu Formasaun Profisionál no Empregu (SEFOPE), Carlito do Rosario, hateten katak to’o agora instituisaun ne’e seidauk simu relatóriu eskrita ofisiál kona-ba kazu asaltu iha Austrália ne’ebé afeta traballadór timoroan sira, inklui sasan sira ne’ebé estraga no lakon, nune’e SEFOPE sei koordena ho traballador sira liuhusi adidu no embaixador atu trata sira nia dokumentu ne’ebé karik lakon hodi kontinua servisu tuir kontratu.
Carlito do Rosario esplika katak kazu ne’e sei presiza tuir prosesu investigasaun no prosedimentu legál ne’ebé aplika iha Austrália, tanba autoridade kompetente iha nasaun ne’e mak hala’o prosesu identifikasaun no investigasaun ba kazu refere, nune’e karik iha evidénsia ka informasaun relevante kona-ba insidente ne’e, parte investigasaun Australia sei hato’o relatóriu informasaun ne’e ba autoridade kompetente atu ajuda prosesu investigasaun.
“Agora daudaun, ami seidauk simu relatóriu eskrita depois investigasaun remata no iha informasaun ne’ebé konfirmadu, ami sei hetan informasaun liuhusi adidu no Embaixada Timor-Leste iha Austrália” dehan Diretór Jerál SEFOPE Carlito do Rosario iha aeroportu internasional Prezidente Nicolao Lobato Dili, (8/10).
Tuir Carlito do Rosario, SEFOPE presiza hein rezultadu investigasaun atu bele hatene ho klaru númeru traballadór timoroan ne’ebé sai vítima, inklui sira ne’ebé sofre prejuízu tanba asaltu no estragu ba sira nia sasán, nune’e nia mos informa katak instituisaun ne’e sei kontinua halo koordenasaun ho adidu no Embaixada Timor-Leste iha Austrália, autoridade relevante no kompanhia sira atu buka solusaun ba problema ne’ebé afeta traballadór timoroan sira, nune’e traballadór sira nia dokumentu importante estraga ka lakon tanba insidente ne’e, SEFOPE sei buka dalan atu ajuda trata dokumentu hirak ne’e, atu nune’e sira bele kontinua hala’o servisu tuir durasaun kontratu ne’ebé sira iha.
Carlito do Rosario mós hatete katak situasaun ne’e la’ós kazu traballadór sira lakon dokumentu ka sasán tanba atividade pesoál, hanesan bá paseiu ka bá hariis tasi, maibé tuir informasaun ne’ebé hato’o ba nia, problema ne’e akontese tanba ema deskonhesidu tama ba sira nia hela-fatin, asalta no na’ok sasán, tanba ne’e SEFOPE sei kontinua koordena ho parte relevante sira atu asegura katak traballadór timoroan ne’ebé afetadu hetan asisténsia ne’ebé presiza, inklui prosesu atu trata fali dokumentu sira ne’ebé estraga ka lakon.
Jornalista: Silvino Freitas
