Dili, 8 de Outubro de 2026 (I-Klik.info)-Traballador Timoroan Jose Asa ne’ebé mout iha tasi iha Australia governu Timor Leste liuhusi Sekretáriu Estadu Formasaun Professionál no Empregu (SEFOPE) halo kooperasaun ho governu Australia konsege identifika Joel Asa nia isin baluk ka ain-ruin hodi lori mai ho aviaun Qantaslink ne’ebé too iha Aeroportu Internasionál Prezidente Nicolao Lobato (AIPNL) Dili iha tuku rua liu minutu tolu nulu lokraik, nune’e governu entrega ona ba família atu bele haloot tuir kultura Joel Asa nian.
Família matebian Ananu Asa dehan, hafoib nia alin hetan insidente refere sira sente triste tebes maibé ho esforsu tomak governu nian kosege lori nia alin isin pedasuk mai atu sira bele haloot tuir kultura, nune’e sira lori família tomak nia naran agradese ba governu ne’ebé halo esforsu tomak atu bele hetan nia alin nia isin maskí isin ne’ebé la kompletu.
“Hau nuudar matebian nia maun reprezenta mos inan aman hotu ami husu obrigado barak ba governu Timor Leste nomos ba embaixador iha Australia” dehan Ananu Asa iha AIPNL, (8/10).
Nia dehan tan, sira prepara kedas ambulansia ne’ebé sira sei tranzlada kedas nia alin nia isin baluk hodi lori ba nia moris fatin iha suku Afaliocai postu administrativu Uatulari munisípiu Vikeke, nune’e Joel Asa nia isin baluk sei haloot iha segunda feira semana oin.
Diretór Jerál SEFOPE Carlito do Rosario Cabral dehan, joven Joel Asa ba servisu iha Australia iha tinan 2022 maibé depois nee nia hasees ba tiha husi sistema maibé la konsidera nia hanesan ilegal tanba nia ba liuhusi prosesu ne’ebé legal entre governu Timor Leste ho governu Australia maskí sira desidi an sai husi sistema maibé hanesan Timoroan SEFOPE halo esforsu hotu husi adidu SEFOPE nomos embaixador nafatin buka tuir tantu iha tasi no iha neebe de’it.
“Ita nia maluk Joel Asa ohin hanesan istória nia hetan dezastre nee iha fulan abril 2026” dehan Diretór Jerál SEFOPE Carlito hafoin entrega isin padasuk Joel Asa ba família iha AIPNL, (8/10).
Nia dehan tan, Joel Asa nia insidente governu koordena ho polísia maritima Australia nian hodi halo esforsu hotu liuhusi Ró no helicopteru maibe la konsege hetan ninia isin mate tuir periodo tempu ne’ebé iha, entaun governu Australia haruka karta ida mai hodi haruka família ba hodi teste raan tau hela raan atu sira hetan isin balun kuandu teste sira haruka mai, nune’e SEFOPE fasilita nia inan ho aman no tian hodi ba hasai raan iha Australia, nune’e sira konsege hetan nia ruin balun maka koko ba raan ne’ebé família tau hela maka sira konsege identifika katak ruin ne’e Joel Asa nian.
“Depois identifika sira haruka informasaun liuhusi adidu SEFOPE ne’ebé koloka iha ne’ebá informa mai SEFOPE ita halo koordenasaun ho família lori mai, tuir loloos mai iha dia 2 maibé tanba falla iha aviaun entaun ohin dia 8 mak lori mai” dehan DJ Carlito.
Traballador Joel Asa Moris iha Viqueque, Afaloicai iha dia 07/06/1995 husi aman, Agustinho Asa no Inan Agustinha Asa, Matebian Joel Asa hetan oportunidade husi Estado Timor-Leste liu-husi Sefope ho programa PALM (Pacific Australia Labour Mobility) iha tinan 2019 hodi registo ba iha sistema work ready Pool iha IRD system, ho Nu ref, TL-SWP-19-1363 no fim hetan portunidade hodi ba servisu iha Australia, iha data 03/10/2024 07/06/2025 husi kompanhia ou agency CONNECT GROUP (ROSE FARM) hanesan traballador durante fulan sia tuir vistu no kontrato.
Maibe Matebian Joel Asa foti dezisaun sai husi Sistema / Asbconded husi Kompanhia/Agency Connect Group(Rose Farm) iha data 22/01/2025, iha dia 06 de abril 2026 hetan informasaun katak traballador Joel Asa lakon ka Mout iha Tasi iha area Emerald Beach coffs Harbour New South Wales ( Australia) insidente ne’e akontense hafoin Vitima ba kail Ikan iha tasi.
Jornalista: Silvino Freitas
