Dili, 13 de Outubro de 2026 (IKLIK.INFO)-Empregador foun husi nasaun Nova Zelandia 6 iha interese ba forsa laboral timoroan nian atu halo rekrutamentu tan ba traballador timoroan nain 95 husi programa Recognize Seasonal Employe (RSE) ne’ebé liuhusi Sekretáriu Estadu Formasaun Profesional no Empregu (SEFOPE) hodi ba servisu iha area horticultura iha nasaun Nova Zelandia.
SEFOPE Rogerio Mendonca dehan, empregador husi New Zealand hamutuk hitu ida mak tuan ne’ebé halo uluk ona rekrutamentu ne’ebé sira iha interese atu halo tan rekrutamentu ba joven sira hamutuk 95 hodi desloka ba Nova Zelandia, nune’e empregador Hortus no Mr. Aple ne’ebé antes ne’e halo ona rekrutamentu sira halo ona promosaun husi expozisaun iha feira ba kompaña sira iha Nova Zelandia hodi hatudu Timor Leste nia preparasaun atu bele ba servisu iha Nova Zelandia, nune’e sira mai ona atu halo kooperasaun ho governu Timor Leste hodi bele rekruta joven sira atu bele ba servisu iha Nova Zelandia.
“Rekrutamentu hahú kedas aban ba oin, sira sei iha nee durante semana ida sira sei viajen ba munisípiu hodi haree situasaun sira ne’ebé iha munisípiu nune’e ekipa sira mai hodi halo rekrutamentu tuir orariu ne’ebé iha ona” dehan SEFOPE Rogerio Mendonca hafoin hasoru malu ho kompaña sira husi Nova Zelandia iha SEKOPE Kaikoli, (13/10).
Nia dehan tan, area neebe timoroan sira atu ba servisu mak area horticultura mak sai area pilotu ne’ebé sai programa Recognize Seasonal Employe (RSE) nune’e iha pilotu primeiru haruka ona timoroan liu nain 30 no segundu maka iha novembru sei haruka tan nain 85 no espera tuir mai iha novembru fulan ikus sei haruka tan nain 95 husi empregador 7 ne’ebé dadaun nee hasoru ona SEFOPE.
“Prioridade nee ba ema sira ne’ebé uluk aplika tiha ona vaga online refere” dehan SEFOPE Rogerio Mendonca.
Rogerio konklui, dezde inisiu pargrama sira haruka traballador timoroan ba estranjeiru hahú ho forsa mane nian, maibe tanba Nova Zelandia mos tau prioridade ba forsa feto nian nune’e partisipasaun feto nian iha programa RSE sei inklui feto ne’ebé barak hodi halo servisu iha Nova Zelandia, nune’e numeiru kandidatu ne’ebé antes nee iha sistema hamutuk ema 2,000 maibé tanba iha ona rekrutamentu halo ona nune’e numeiru ne’e tun ona.
Jornalista: Silvino Freitas
