Díli, 13 Agostu 2026 (Iklik.info)– Game online ne’ebé sai preokupasaun ba komunidade iha Munisípiu Dili, agora sai alvu husi Autoridade Munisipiu Dili (AMD) hamutuk ho Komandu Polísia Nasionál Timor-Leste (PNTL) Munisípiu Dili, ne’ebé sei halo operasaun surpresa ka vizilánsia iha suku no aldeia sira iha Dili laran atu kombate atividade game online no garante situasaun seguransa no hakmatek ba komunidade.
Prezidente Autoridade Munisipiu Dili (PAMD), Francisco dos Santos, hateten, AMD hamutuk ho Komandu PNTL Munisipiu Dili, Suku 31 no Aldeia 222 komprometidu hakarak deklara katak, sei halo kontrolu ba fatin sira iha Munisipiu Dili hodi kontrola ka kombate game online ne’ebé oras ne’e sai preokupasaun ba komunidade iha Dili laran.
“Objetivu husi vizilansia total ka sweeping ne’e, atu hapara ka kombate game online ne’ebé oras daudaun sai nafatin polemika, atu garante komunidade iha Dili laran bele moris iha situasaun ne’ebé hakmatek no seguru,” dehan Prezidente Autoridade Munisipiu Dili, Francisco dos Santos, liu husi konferénsia Imprensa iha Salaun PNTL Kaikoli Dili, Kinta 13/08
Tanba ne’e, Autoridade Munisipiu Dili hamutuk ho ekipa komandu PNTL Dili hakarak informa no konvida komunidade Dili tomak atu partisipa ho ativu iha vizilansia ne’ebé maka autoridade AMD ho komandu PNTL Munisipiu Dili sei hala’o.
Kompozisaun ba ekipa konjunta ne’ebé maka sei hala’o iha Bairo iha Munisipiu Dili nian kompostu husi Autoridade Xefe Suku, Xefe Aldeia, Lia Nain, Juventude no Ofisial Polisia Suku.
No ekipa konjunta sei halo identifikasaun no monitorizasaun ba problema sira iha komunidade. Problema ne’ebé konsidera menus grave sei rezolve diretamente iha nivel suku, enkuantu problema ne’ebé grave sei reporta ba Komandu PNTL atu foti asaun tuir nesesidade.
“Opersaun konjuta ne’ebé maka sei halo iha kada suku ne’e hahú ohin, ami alarga ona ba iha xefe suku sira no mós OPS. Ekipa konjuta ninia servisu maka ne’e, primeiru tun ba halo identfikasaun. No identifikasaun haree ba nia grau, kualker la’os problema online de’it, maibé problema sira seluk hotu, problema ne’ebé kaman sei resolve iha ne’eba, maibé kuandu haree problema ne’e grave, informa mai iha komandu para atu bele foti asaun ruma,”nia dehan.
Nia haktuir, opersaun ne’e sei hala’o iha tempu ne’ebé la’o tuir oportunidade no la sei fó sai uluk, atu ekipa bele observa situasaun iha terrenu ho efetivu.
Nune’e vizilánsia mós sei inklui fatin hanesan hotel, apartamentu no área sira ne’ebé sidadaun estranjeiru hela, bainhira iha indikasaun ka suspeita kona-ba problema seguransa.
Iha fatin hanesan, Segundu Komandante PNTL Munisipiu Dili, Superintendente, Luis da Silva, apela ba komunidade atu sai matan no tilun ba seguransa, liuliu bainhira haree atividade ka situasaun ne’ebé konsidera la di’ak. Komunidade bele infórma lalais ba Komandu PNTL, atu autoridade bele halo intervensaun no asaun preventiva.
“Atu fó hatete ba povu tomaka ba autoridade sira, sai matan tilun ba seguransa ninia, karik buat ruma ne’ebé maka haree la di’ak ka la dun di’ak informa lalais ba komandu PNTL hodi nune’e atu halo nia atuasaun,” nia apela ba komunidade.
Jornalsita: David da Costa
