Polísia Nasionál liuhosi Diresaun Servisu Investigasaun Kriminál (DSIK) no Diresaun Servisu Intelijénsia Polísia (DSIP), hala’o operasaun konjunta durante kalan hodi detein tan sidadaun estranjeiru nain 15 inklui feto nain rua ne’ebé suspeitadu ba kazu Scam Call Center iha fatin 3 iha kapital Dili mak iha área Santa Cruz, Bebonuk no Vila Verde.
“Durante operasaun, Ekipa Konjunta konsege identifika no desmantela atividade iha lokalizasaun hirak ne’e, no halo apreensaun mos sasán no ekipamentu sira ne’ebé suspeita uza hodi hala’o atividade ne’ebé investiga hela” haktuir komunikadu ne’ebé IKlik.info asesu liuhusi ofisiál média Polísia Nasionál, (12/08).
Komunikadu ne’e informa tan, evidénsia sira ne’ebé hetan apreensaun husi Ekipa Konjunta mak hanesan Starlink no router set 4, laptop unidade 19, desktop unidade 2, no telemóvel Samsung no iPhone unidade 22. Evidénsia hirak ne’e asegura ona no sei submete ba prosesu investigasaun tuir prosedimentu legal ne’ebé vigora iha Timor-Leste, nune’e husi operasaun iha fatin tolu remata, Ekipa Konjunta transporta sidadaun estranjeiru na’in-15 hamutuk ho evidénsia sira ba Edifísiu Direksaun Servisu Investigasaun Kriminál (DSIK), iha Kuartel Jerál PNTL, Caicoli, hodi kontinua prosesu investigasaun.
“Sidadaun estranjeiru sira sei hela iha detensaun polísia durante oras 72, tuir prosedimentu legal, molok autoridade kompetente aprezenta sira ba interrogatóriu dahuluk iha Tribunal, hodi permite Tribunal foti desizaun tuir lei ne’ebé vigora iha Timor-Leste” informa komunikadu husi média Polísia Nasionál.
Jornalista: Silvino Freitas
