Díli, 10 Novembru 2026 (Iklik.Info) — Deputadu Bankada Partidu Libertasaun Popular (PLP), husu Governu atu klarifika impaktu real husi alokasaun orsamentu US$1,9 millaun ba inkluzaun ema ho defisiénsia iha OGE 2027, liuliu kona-ba asesibilidade iha espasu públiku, asesu ba servisu públiku no garantia ba direitu sira, atu asegura katak orsamentu ne’e fó benefísiu direta ba ema ho defisiénsia.
Deputadu Bankada PLP Adolfo Martins hateten, Kona-ba markador orsamentu ba ema ho defisiénsia, Adolfo Martins refere ba montante US$252 millaun, maibé nia esplika katak alokasaun espesífika ba inkluzaun defisiénsia hamutuk US$1,9 millaun, ne’e la signifika katak osan ne’e hotu sei aloka diretamente ba nesesidade ema ho defisiénsia.
Deputadu Bankada PLP Adolfo husu atu haree impaktu real husi alokasaun orsamentu ne’e, liuliu husi asesibilidade iha espasu públiku, asesu ba servisu públiku no respeitu ba direitu ema ho defisiénsia sira.
“Se alokasaun boot ida ne’e mak ita tau ba EhD hodi fó impaktu direta ba sira, maka husi tinan 2026 ita bele haree EhD sira nia asesu públiku, asesu ba servisu, sira nia direitu ita trata ho justu ona ka lae?” dehan deputadu Bankada PLP Adolfo bainhira halo intervensaun debate OJE 2027 faze jeneralidade iha Parlamentu Nasionál, Tersa 10/11.
Deputadu Bankada PLP Adolfo kontinua ho pergunta kona-ba númeru infraestrutura ne’ebé asesível ba ema ho defisiénsia no númeru instituisaun edukasaun inkluziva ne’ebé estabelese ona atu garante katak sira bele asesu edukasaun ho dignidade no konfortu.
“Infraestrutura hira mak asesível ba EhD? Edukasaun inkluziva hira ona mak estabelese hodi sira asesu ho dignu no konfortável? La iha!” deputadu Adolfo afirma.
Adolfo Martins konsidera katak, bazeia ba esperiénsia ne’ebé akontese durante ne’e, orsamentu ba kompromisu Jéneru no Defisiénsia barak liu uza ba despeza operasionál, kombustível no manutensaun, enkuantu impaktu direta ba benefisiáriu sira seidauk klaru.
Jornalista: David da Costa
